ކ. ގިރިފުށީގެ ބިން ހިއްކުމާއި ބަނދަރު ތަރައްގީކުރުމުގެ ބިޔަ މަޝްރޫއު ކުރިއަށްދާ ގޮތް ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުޙައްމަދު މުޢިއްޒު ބައްލަވާލައްވައިފި އެވެ.

ރައީސް މި މަސައްކަތް ބައްލަވާލެއްވީ، ސިފައިންގެ 72 ވަނަ އަދި 73 ވަނަ އަސާސީ ތަމްރީނު ކޯހުގެ ދަރިވަރުން ހުވާކުރުމާއި ބަޑި ހަވާލުކުރުމުގެ ރަސްމިއްޔާތުގައި ބައިވެރިވެވަޑައިގަތުމަށް މިއަދު ގިރިފުއްޓަށް ކުރެއްވި ޒިޔާރަތުގެ ތެރެއިންނެވެ. މި ޒިޔާރަތުގައި އެމަނިކުފާނުގެ އަރިހުގައި ޑިފެންސް މިނިސްޓަރު ހަސަން ރަޝީދު އާއި، ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީގެ އިތުރުން އެމްޓީސީސީގެ ސީއީއޯ އަހްމަދު ސައުދީ ބައިވެރިވެވަޑައިގެންނެވި އެވެ.

މި މަޝްރޫއަކީ ދިވެހި އަސްކަރިއްޔާގެ ގާބިލްކަން އިތުރުކުރުމަށްޓަކައި ރައީސުލްޖުމްހޫރިއްޔާ ގެންގުޅުއްވާ އިސްތިރާޖީ ތަސައްވުރުގެ ދަށުން، ސިފައިންނަށް ބޭނުންވާ ތަމްރީނު ވަސީލަތްތައް ޒަމާނީ ފެންވަރަށް ތަރައްގީކުރުމަށް ފަށާފައިވާ މުހިންމު މަޝްރޫއެކެވެ. އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއުގެ އަގަކީ 182.79 މިލިއަން ރުފިޔާ އެވެ.

މި މަޝްރޫއުގެ ދަށުން ގިރިފުށީގައި މިހާރު އޮތް 5.7 ހެކްޓަރުގެ ބިމުގެ އިތުރަށް 13.3 ހެކްޓަރުގެ ބިން ހިއްކުމަށް ވަނީ ހަމަޖެހިފަ އެވެ. އެމްޓީސީސީން ބުނިގޮތުގައި، މި މަޝްރޫއުގެ ތެރޭގައި 375,512 ކިއުބިކް މީޓަރުގެ ސަރަހައްދެއް ހިއްކުމާއި، 2,712 މީޓަރުގެ ރިވެޓްމަންޓް ޖެހުމާއި، ބޭރުތޮށްޓާއި ޖެޓީ ތަރައްގީކުރުން ހިމެނެ އެވެ.

މީގެ އިތުރުން، މިހާރު އެ ރަށުގައި ބޭނުންކުރާ 100 މީޓަރުގެ ފަޔަރިންގް ރޭންޖުގެ ބަދަލުގައި، 300 މީޓަރުގެ ޒަމާނީ 'ސްމޯލް އާމްސް ރޭންޖެއް' ތަރައްޤީކުރުމަށް ވަނީ ނިންމާފަ އެވެ. މި މަޝްރޫއު ނިމުމުން، ގިރިފުށި ވެގެންދާނީ ރައީސް އިފުތިތާހް ކުރައްވާފައިވާ "ދިވެހި ވަތަނީ ހިދުމަތް" ޕްރޮގްރާމާއި، އަސްކަރިއްޔާގެ އެކި ތަމްރީނުތަކަށް ބޭނުންވާ ހުރިހާ ވަސީލަތްތަކެއް ގާއިމުވެފައިވާ މައި މަރުކަޒަށެވެ.

މިދިޔަ ޖޫން މަހުގެ 20 ވަނަ ދުވަހު އަމަލީ މަސައްކަތް ފެށި މި މަޝްރޫޢަކީ އެއް އަހަރު ދުވަހުގެ ތެރޭގައި ނިންމުމަށް ތާވަލުކުރެވިފައިވާ މަސައްކަތެއްކަން ފާހަގަކޮށްލެވެ އެވެ.