ސޫރިޔާގެ ސަރަޙައްދީ މިނިވަންކަމަށް އަރައިގަނެ، ޒަޔަނިސްޓު އިސްރާއީލުގެ ނިރުބަވެރި ފައުޖުން ދިން ލާއިންސާނީ ޙަމަލާތަކެއްގައި، ސޫރިޔާގެ އަސްކަރިއްޔާގެ 18 ސިފައިން ޝަހީދުކޮށްލައިފިއެވެ. މި ޙަމަލާތައް އަމާޒުކޮށްފައި ވަނީ ސޫރިޔާގެ އަލް-ސުވަޔިދާގައި ދްރޫޒީ ވަންހައިގެ މީހުންނާއި ބަދަވީންނާ ދެމެދު ހިނގަމުންދާ ކުރިމަތިލުންތައް ހުއްޓުވުމަށް، އެ ސަރަޙައްދަށް ދަތުރުކުރި ސޫރިޔާ ސިފައިންގެ އަސްކަރީ ޓޭންކުތަކަށެވެ.
ސޫރިޔާގެ ދިފާޢީ ވުޒާރާއިން ހާމަކުރެއްވި ގޮތުގައި، ޒަޔަނިސްޓުންގެ މި ޙަމަލާތައް އެންމެ ބޮޑަށް އަމާޒުކޮށްފައި ވަނީ ދްރޫޒީންގެ އާބާދީ ބޮޑު ސުވަޔިދާ ސަރަޙައްދަށެވެ. މި ޙަމަލާތައް ޔަހޫދީން އަމާޒުކުރީ ސޫރިޔާގެ ދާޚިލީ މައްސަލަތަކަށް ހައްލެއް ހޯދުމަށް މަސައްކަތްކުރި އަސްކަރީ ޓޭންކުފަހަރަށެވެ. ސުވަޔިދާގައި ދިރިއުޅޭ ދްރޫޒީންނާއި ބަދަވީންނާއި ދެމެދު މި ހަމަނުޖެހުން ހިނގަން ފަށާފައިވަނީ މި ޖުލައި މަހުގެ 13 ވަނަ ދުވަހުއެވެ.
ސޫރިޔާގެ ދިފާޢީ ވުޒާރާގެ ތަރުޖަމާނު ޙަސަން ޢަބްދުލްޣަނީ ވިދާޅުވީ، ސުވަޔިދާގައި ހަރަކާތްތެރިވަމުންދާ ހަތިޔާރު އެޅި ޖަމާޢަތްތަކަކުން ވެސް ސޫރިޔާގެ އަސްކަރިއްޔާގެ ސިފައިންނަށް ޙަމަލާތަކެއް ދީފައިވާ ކަމަށާއި، އެ ޙަމަލާތަކުގައި ގިނަ އަދަދެއްގެ ސިފައިން ޒަޚަމުވެފައިވާ ކަމަށެވެ. ނަމަވެސް، އެއީ ކޮން ދަރިކޮޅަކަށް ނިސްބަތްވާ ހަނގުރާމަވެރި ޖަމާޢަތްތަކެއް ކަން އޭނާ ސާފުކޮށްދެއްވައިފައެއް ނުވެއެވެ. މީގެ އިތުރުން ސޫރިޔާގެ ސިފައިންނާއި ޢާންމުންނާއި ދެމެދު ވެސް ކުރިމަތިލުންތަކެއް ހިނގާފައިވާ ކަމަށް ރިޕޯޓުތައް ބުނެއެވެ.
Advertisement
ސޫރިޔާގެ އަސްކަރީ ޓޭނަކުތަކަށް ޙަމަލާ ދިން ކަމަށް ޔަހޫދީން ވެސް އެއްބަސްވެއެވެ. އެ މީހުން ބުނީ، ޙަމަލާ ދިނީ ދްރޫޒީންގެ ޙިމާޔަތުގައެވެ.
ޒަޔަނިސްޓު އިސްރާއީލުގައި ވެސް ދްރޫޒީ ވަންހައިގެ 120,000އެއްހާ މީހުން ދިރިއުޅެއެވެ. އޭގެ ތެރެއިން ބޮޑު އިންސައްތައެއް ދިރިއުޅެނީ، ޔަހޫދީން ޣައިރު ޤާނޫނީ ގޮތުން ވެރިވެގަނެފައިވާ ސޫރިޔާގެ އަލް-ޖޫލާންގެ އުސް ބިންތަކުގައެވެ.
ސުވަޔިދާގައި ދިރިއުޅޭ ދްރޫޒީންނާއި ބަދަވީންނާ ދެމެދު ހިނގި ކުރިމަތިލުންތަކުގައި 30އެއްހާ މީހުން ވަނީ މަރުވެފައެވެ. ސޫރިޔާގައި ވެރިކަން ކުރާ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ސަރުކާރުން އެ ސަރަޙައްދަށް ސިފައިން ފޮނުވާފައި ވަނީ އެ ހަމަނުޖެހުންތައް ހުއްޓުވުމުގެ ނަމުގައެވެ.
