ސްރީ ލަންކާއާއި ދިވެހިރާއްޖޭގެ މަތީ ތައުލީމުގެ ފެންވަރު ރަނގަޅު ކުރުމަށް ސްރީ ލަންކާގެ ހައި ކޮމިޝަނަރު، ތިމުތު ދިސާނަޔަކާއާއި ދިވެހިރާއްޖޭގެ މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާއި ބެހޭ ވުޒާރާގެ އިސްވެރިން މަޝްވަރާކުރައްވައިފި އެވެ.
މި މަޝްވަރާ ކުރައްވާފައިވަނީ މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާއި ބެހޭ ވުޒާރާއަށް އެކަމަނާ ކުރެއްވި ޒިޔާރާތެއްގައި ވުޒާރާގެ އިސްބޭފުޅުންނާއިއެކު ބޭއްވި ބައްދަލުވުމެއްގަ އެވެ.
މި ބައްދަލުވުމުގައި ދިވެހިރާއްޖެ އަދި ސްރީ ލަންކާއާއި ދެމެދު އޮންނަ ގުޅުން ބަދަހިކުރުމާއި، ދެ ފަރާތުގެ މަސްލަޙަތު ހިމެނޭހެން ދެ ދައުލަތުގެ ކުރިއެރުމަށް މަސައްކަތްކުރުމާއި ގުޅޭގޮތުން މަޝްވަރާކުރައްވާފައިވާ ކަމަށް ވުޒާރާއިން ބުނެފައިވެއެވެ. އެގޮތުން، ދެ ގައުމުގެ މަތީ ތަޢުލީމުގެ ފެންވަރު ރަނގަޅުކުރުމަށް ގުޅިގެން ކުރެވެން ހުރި މަސައްކަތްތަކުގެ މައްޗަށް އަލިއަޅުވާލާފައިވާ ކަމަށް ވުޒާރާއިން ބުންޏެވެ.
މި މަޝްވަރާ ބައްދަލުވުމުގައި، މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާއި ބެހޭ ވުޒާރާގެ ސްޓޭޓް މިނިސްޓަރު، ޑރ. އަބްދުލްރަހީމް ހަސަން އާއި ސްޓޭޓް ފާތިމަތު މުހައްމަދު، ޑެޕިއުޓީ މިނިސްޓަރު، އައިމިނަތު ޝަޝީ އަދި މޯލްޑިވްސް ކޮލިފިކޭޝަންސް އޮތޯރިޓީ (އެމް.ކިޔު.އޭ)ގެ ސީއއީއޯ މަރްޔަމް ފިޒާނާ ރަޝީދު ބައިވެރިވެވަޑައިގެންނެވި ކަމަށް ވުޒާރާއިން މައުލޫމާތުދީފައިވެ އެވެ.
