ފޭސްބުކްގައި ހިއްސާކުރި ކޮމެންޓަކާ ގުޅިގެން އިސްލާމްދީނަށާއި ރަސޫލާއަށް ފުރައްސާރަކުރި ކަމުގެ ކުށް ސާބިތުވެ، ސައުދީ އަރަބިއްޔާގައި މަސައްކަތްކުރަމުންދާ ސްރީލަންކާގެ ޒުވާން ބިދޭސީ މަސައްކަތްތެރިއަކަށް މަރުގެ އަދަބު އިއްވައިފިއެވެ.
އުމުރުން 24 އަހަރުގެ އަނޯޖަން ސިވަރާސާގެ މައްޗަށް ކުރިން އަލް-އަހްސާ ކްރިމިނަލް ކޯޓުން އިއްވާފައިވަނީ 5 އަހަރުގެ ޖަލު ހުކުމަކާއެކު 3 މިލިއަން ސައުދީ ރިޔާލުން (800,000 އެމެރިކާ ޑޮލަރު) ޖޫރިމަނާކުރުމެވެ. ނަމަވެސް، ޕްރޮސެކިއުޓަރުން އެ މައްސަލަ އިސްތިއުނާފުކޮށް ޝަރީއަތުގެ ހަރުކަށި އުސޫލުތަކުގެ ދަށުން ބަލައިދިނުމަށް އެދުމާ ގުޅިގެން، ސެޕްޓެމްބަރު 17 ވަނަ ދުވަހު އިސްތިއުނާފު ކޯޓުން ވަނީ އޭނާއަށް މަރުގެ އަދަބު އިއްވާފައެވެ.
މި މައްސަލަ ފެށިގެން އައީ ސްރީލަންކާގައި ސޯޝަލް މީޑީއާގައި ހިނގައިދިޔަ ދީނީ ދެބަސްވުމަކާ ގުޅިގެންނެވެ. ހިންދޫ ކަލާނގެއަކަށް ފުރައްސާރަކޮށް ދެއްކި ވާހަކަތަކަކަށް ރައްދުދެމުން އަނޯޖަން ވަނީ ތަމަޅަ ބަހުން ކީރިތި ރަސޫލާއަށް ފުރައްސާރަކުރާ ފަދަ ކޮމެންޓެއް ކޮށްފައެވެ. ފަހުން އޭނާ އެ ކޮމެންޓް ޑިލީޓްކޮށް މާފަށް އެދުނު ނަމަވެސް، އެ ސްކްރީންޝޮޓްތައް ސައުދީގައި ހުންނަ އޭނާގެ ކޮމްޕެނީގެ ވެރިޔާއަށް ލިބުމުން ވެރިޔާ ވަނީ ކަމާބެހޭ ފަރާތްތަކަށް ރިޕޯޓުކޮށްފައެވެ.
Advertisement
މިއަހަރުގެ ޖުލައި މަހު އަނޯޖަން ހައްޔަރުކޮށް، އޭނާގެ އިލެކްޓްރޯނިކް ވަސީލަތްތަކާއި ސޯޝަލް މީޑީއާ އެކައުންޓްތައް ވަނީ ހިފަހައްޓާފައެވެ.
އަނޯޖަންގެ އާއިލާއިން ވަނީ މާފަށް އެދި އާދޭސްކޮށްފައެވެ. އަދި ސްރީލަންކާ ސަރުކާރުންދަނީ އޭނާއަށް މާފު ހޯދައިދިނުމަށް ޑިޕްލޮމެޓިކް މަސައްކަތްތައް ކުރަމުންނެވެ. ސެޕްޓެމްބަރު 21 ގައި އަނޯޖަންގެ އާއިލާ ސްރީލަންކާގެ ރައީސް އަނުރާ ކުމާރާ ދިސާނަޔަކާ ބައްދަލުކުރެއްވި އިރު، އޭނާއަށް މާފު ހޯދައިދިނުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް ރައީސް ވައުދުވެވަޑައިގެންނެވިއެވެ. މީގެއިތުރުން، ސްރީލަންކާގެ ގާނޫނީ ވަކީލުންގެ ޓީމެއް މިހާރު ވަނީ ސައުދީއަށް ގޮސްފައެވެ.
ސެޕްޓެމްބަރު 28 ވަނަ ދުވަހުން ފެށިގެން އަނޯޖަންގެ އެއްވެސް ހަބަރެއް ނުވާ ކަމަށް އާއިލާއިން ބުނާއިރު، އޭނާގެ މައްޗަށް ހުކުމް ތަންފީޒުކުރާނެ ދުވަހެއް ސައުދީ ކަމާބެހޭ ފަރާތްތަކުން އަދި ހާމަކޮށްފައެއް ނުވެއެވެ.
