ރާއްޖޭގައި މަރުގެ އަދަބު ތަންފީޒުކުރުމާ ގުޅޭ ޚާއްޞަ ބިލެއް ރައްޔިތުންގެ މަޖިލީހަށް ފޮނުއްވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ޝަރުޢީ ތިން މަރުޙަލާ ނިމި، މަރުގެ އަދަބު ތަންފީޒު ކުރުމަށް ޙުކުމް އިއްވާފައިވާ ފަރާތްތައް މިހާރުވެސް ރާއްޖޭގައި އެބަތިބި ކަމަށެވެ. ނަމަވެސް، މީގެ ކުރީގެ އެއްވެސް ސަރުކާރަކުން އެކަން ތަންފީޒުކުރަން ބޭނުންވެފައި ނުވާކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ ދިވެހިރާއްޖެއަކީ ސައްތައިން ސައްތަ އިސްލާމީ ޤައުމަކަށް ވީހިނދު، މި ރާއްޖޭގައި ކަންކަން ހިނގަންވާނީ އިސްލާމީ ޝަރީޢަތުގައި އެކަން އޮންނަ އުޞޫލުން ކަމަށެވެ. އަދި ރާއްޖޭގެ ޤާނޫނުތައް ހަދަންވާނީވެސް އިސްލާމްދީނުގެ އަސާސްތަކާ އެއްގޮތަށް ކަމަށް އެމަނިކުފާނު ވިދާޅުވިއެވެ.
Advertisement
މަރުގެ އަދަބު ތަންފީޒުކުރުމުގެ މުހިންމުކަމަށް އަލިއަޅުއްވާލައްވަމުން ރައީސް ވިދާޅުވީ މައިގަނޑު ދެ ކަމެއްގައި މި އަދަބު ތަންފީޒުކުރެވެން ޖެހޭ ކަމަށެވެ. އެއީ ޤިޞާޞް ހިފުމާއި، މަސްތުވާތަކެތި ޓްރެފިކް ކުރާ ފަރާތްތަކަށެވެ. ކީރިތި ޤުރުއާނުން ދަލީލު ނަންގަވަމުން ރައީސް ބަޔާންކުރެއްވީ، ޤިޞާޞް ހިފުމަކީ މާތް ﷲ ފަރުޟު ކުރައްވާފައިވާ ކަމެއް ކަމަށާއި އެއީ ޤުރުއާނުގައި ވަރަށް ސާފުކޮށް ބަޔާންކުރައްވާފައިވާ ކަމެއް ކަމަށެވެ. އަދި މަރަށް މަރު ހިފުމަކީ ވެރިމީހާއަށް ނުވަތަ ޙާކިމާއަށް އޮތް އިޚްތިޔާރީ ޙައްޤެއް ނޫން ކަމަށާއި، އެއީ ޝަރުޢީ ހަމަތަކުގެ މަތިން ވާރިޘުންނަށް އޮންނަ ޙައްޤެއް ކަމަށް ވިދާޅުވިއެވެ.
މީގެއިތުރުން، މި ނިންމުމާ ގުޅިގެން ދެކޮޅުހަދާ ފަރާތްތަކެއް ތިބޭނެކަން ފާހަގަކުރައްވައި ރައީސް ވިދާޅުވީ، ކޮންމެ ފަރާތަކުން ދެކޮޅު ހެދި ނަމަވެސް އަނިޔާ ލިބޭ މީހުންނާއި މުޖުތަމަޢުގެ ޙައްޤުތައް ޙިމާޔަތްކޮށްދޭން ޖެހޭނެ ކަމަށެވެ. އަދި އެއްވެސް މީހަކަށް އެކަކު އަނެކަކުގެ ފުރާނައަށާއި އަބުރަށް އަރައިގަތުމަކީ އިސްލާމްދީން އެއްވެސް މިންވަރަކަށް ހުއްދަކުރާ ކަމެއް ނޫން ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ ސަރުކާރުން އަބަދުވެސް މަސައްކަތް ކުރާނީ ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް، އިސްލާމީ ޝަރީޢަތް ޤާއިމުކުރުމަށް ކަމަށެވެ.
