ސްރީލަންކާގައި އެޗްއައިވީ ޖެހޭ މީހުންގެ އަދަދު އިތުރުވަމުންދާ ކަމަށާއި، ވޭތުވެދިޔަ އަހަރުގެ ތެރޭގައި އެކަނިވެސް އަލަށް 860 ކޭސް ރިޕޯޓުކޮށްފައިވާ ކަމަށް އެ ޤައުމުގެ ނޭޝަނަލް އެސްޓީޑީ/އެއިޑްސް ކޮންޓްރޯލް ޕްރޮގްރާމުން ހާމަކޮށްފިއެވެ.
އެންމެ ފަހުގެ ތަފާސްހިސާބުތައް ދައްކާ ގޮތުން، ސްރީލަންކާއިން މިހާތަނަށް އެޗްއައިވީ ފެނުނު މީހުންގެ ޖުމްލަ އަދަދު މިހާރު ވަނީ 7،403 އަށް އަރާފައެވެ.
އޮފިޝަލުން ވިދާޅުވި ގޮތުގައި ވޭތުވެދިޔަ އަހަރުގެ ހަތަރުވަނަ ކުއާޓަރުގެ ނިޔަލަށް، އެ ގައުމުގައި ޖުމްލަ 1،217،419 މީހުން ވަނީ އެޗްއައިވީއަށް ޓެސްޓުކޮށްފައެވެ. ޓެސްޓު ކުރެވުނު މީހުންގެ ތެރެއިން ބަލި ފެނިފައިވާ ނިސްބަތަކީ (ޑިޓެކްޝަން ރޭޓް) 0.07 އިންސައްތައެވެ.
Advertisement
ނޭޝަނަލް އެސްޓީޑީ/އެއިޑްސް ކޮންޓްރޯލް ޕްރޮގްރާމުން ފާހަގަކުރި ގޮތުގައި، އަހަރުގެ ހަތަރުވަނަ ކުއާޓަރުގައި ރިޕޯޓުކުރި ކޭސްތަކަށް ބަލާއިރު ޖިންސުގެ ގޮތުން ބޮޑު ފަރަގެއް ފެންނަން އެބައޮތެވެ. އެގޮތުން ބަލި ޖެހުނު ފިރިހެނުންނާއި އަންހެނުންގެ ނިސްބަތަކީ ކޮންމެ 1 އަންހެނަކަށް 7 ފިރިހެނުންނެވެ.
މީގެ އިތުރުން، އުމުރުން 15 އަހަރާއި 24 އަހަރާ ދެމެދުގެ ޒުވާނުންގެ މެދުގައިވެސް އަލަށް އެޗްއައިވީ ޖެހިފައިވާ ކޭސްތައް ރިޕޯޓުކޮށްފައިވާއިރު، ބޮޑެތި މީހުންގެ އާބާދީގައި އެޗްއައިވީ ފެތުރިފައިވާ މިންވަރު އުޅެނީ 0.1 އިންސައްތައިގައެވެ.
ސިއްހީ އިދާރާތަކުން ތަކުރާރުކޮށް ހަނދާންކޮށްދެނީ ކުރީކޮޅުގައި ބަލި ދެނެގަނެ ޓެސްޓު ކުރުމުގެ މުހިންމުކަމެވެ. އެގޮތުން އަވަހަށް ފަރުވާ ފެށުމަކީ ބަލި ޖެހިފައިވާ މީހުންނަށް ދުޅަހެޔޮ ސިއްހަތެއްގައި ދިރިއުޅުމުގެ ފުރުސަތު ލިބި، އެހެން މީހުންގެ ގަޔަށް ބަލި ފެތުރުމުގެ ނުރައްކާ ކުޑަކޮށްދޭނެ ކަމެއް ކަމަށް ވިދާޅުވިއެވެ.
ސްރީލަންކާގައި ކޭސްތައް އިތުރުވަމުން މިދަނީ މުޅި ދުނިޔޭގައިވެސް މި ބަލި އިތުރުވަމުންދާ ދަނޑިވަޅެއްގައެވެ. ޔޫއެންއެއިޑްސް އިން ހާމަކޮށްފައިވާ ގޮތުގައި 2025 ވަނަ އަހަރުގެ ތެރޭގައި ދުނިޔޭގެ 21 ގައުމެއްގައި އެޗްއައިވީ ޖެހޭ މިންވަރު ވަނީ އިތުރުވެފައެވެ. އޭގެ ތެރޭގައި އަފްގާނިސްތާން، ސްރީލަންކާ، ނޭޕާލް، ކެންޔާ، ސޫދާން، ބްރެޒިލް، ޕާކިސްތާން، ޔަމަން، މިސްރު، ސެނެގޯލް އަދި ފިލިޕީންސް ހިމެނެއެވެ.
