އެމެރިކާއިން ޔޫކްރެއިނަށް އެންމެ ފަހުގެ ޒަމާނީ އަސްކަރީ ސާމާނުތަކެއް ފޯރުކޮށްދޭނެކަން އެމެރިކާގެ ރައީސް ޑޮނަލްޑް ޓްރަންޕް ރޭ ކަށަވަރުކޮށްދީފިއެވެ. މި ސާމާނުތަކުގެ ތެރޭގައި ޔޫކްރެއިނުން އެންމެ ބޮޑަށް ބޭނުންވެފައިވާ ޕެޓްރިއޮޓް މިސައިލް ދިފާޢީ ނިޒާމް ވެސް ހިމެނެއެވެ.
ޓީވީ މެދުވެރިކޮށް ރޭ ވާހަކަފުޅު ދައްކަވަމުން ޓްރަންޕް ވަނީ، ރަޝިޔާއިން ޔޫކްރެއިނަށް ދެމުންދާ ވައިގެ ހަމަލާތައް ގިނަވަމުންދާތީ، އެ ޤައުމު ދިފާޢުކުރުމުގެ މުހިންމުކަމަށް ބާރުއަޅުއްވާފައެވެ. އަދި، މި އަސްކަރީ އެހީގެ ފައިސާގެ 100 އިންސައްތަ އެމެރިކާއަށް އަނބުރާ ލިބޭނެ ކަމަށް ވެސް ޓްރަންޕް ވަނީ ވިދާޅުވެފައެވެ.
"މިއީ މާކުރިން ވެސް ވާންޖެހޭ ކަމެއް،" ޓްރަންޕް ވިދާޅުވިއެވެ. ކުރީގެ ސަރުކާރުތަކުން ޔޫކްރެއިނަށް ދިން އެހީތެރިކަން އެހާ ހަމަޖެހޭ އެހީތެރިކަމެއް ނޫން ކަމަށް ވިދާޅުވެ ޓްރަންޕް ވަނީ ފާޑުކިޔުއްވާފައެވެ.
Advertisement
ޓްރަންޕް ވަނީ ރަޝިޔާގެ ރައީސް ވްލަޑިމިއަރ ޕޫޓިން ވާހަކަދައްކާ ގޮތާއި ޢަމަލާއި ދިމާނުވާ ކަމަށް ބުނެފައެވެ. "އޭނާ … ރީތިކޮށް ވާހަކަ ދައްކާފައި، ރޭގަނޑު ހުރިހާ ތަނަކަށް ބޮން އަޅަނީ،" ޔޫކްރެއިންގެ ރަށްތަކަށް ރަޝިޔާއިން މިސައިލް ހަމަލާތައް ދިނުން ނުހުއްޓާ ކުރިއަށްދާކަން ފާހަގަކުރައްވައި ޕޫޓިން އަށް ފާޑު ކިޔަމުން ޓްރަންޕް ވިދާޅުވިއެވެ.
ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވަނީ މި ކަމަށްޓަކައި ޓްރަމްޕަށް މަރުޙަބާ ކިޔާފައެވެ. ޔޫކްރެއިންގެ އަސާސީ ވަސީލަތްތަކަށް ދެމުންދާ ހަމަލާތައް އިތުރުވަމުންދާތީ، އެމެރިކާއިން އަސްކަރީ އެހީ ދިނުން އަލުން ފެށިކަން ޒެލެންސްކީ ވެސް ވަނީ ކަށަވަރުކޮށްދެއްވާފައެވެ.
ބެލެވޭ ގޮތުގައި މިއީ އެމެރިކާ އާއި ޔުކްރޭނާއި ދެމެދު ހަދާފައިވާ ޑީލެކެވެ. މި ޑީލުގެ ސަބަބުން ޔުކްރޭނުގެ މިނަރަލްސް އާއި މަޢުދަންތައް އެމެރިކާއަށް ލިބޭނެއެވެ.
