ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި މިއަދު ފުރަތަމަ ފަހަރަށް އޭރޯ ބްރިޖަކާއި މަތިންދާބޯޓެއް ގުޅުވާލައި، ކާމިޔާބު ޓްރަޔަލްއެއް ކުރިއަށް ގެންގޮސްފިއެވެ. މިއީ ވީއައިއޭގެ އާ ޓާމިނަލް ހުޅުވުމުގެ ކުރިން ކުރިއަށް ގެންދަންޖެހޭ އޮޕަރޭޝަނަލް ރެޑިނެސް ޓެސްޓް (އޮރާޓް) ޕްރޮސެސްގެ ތެރެއިން ކުރިއަށް ގެންދިޔަ މުހިންމު ޓްރަޔަލްއެކެވެ.

މި ޓްރަޔަލް ފައްޓަވައި ދެއްވީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދެވެ. މި މުހިންމު ޓްރަޔަލްގައި ކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު ލަމްއާން އާއި ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފު ވެސް ބައިވެރިވެ ވަޑައިގެންނެވިއެވެ.

މިކަމުގެ މުހިންމުކަމަށް އަލިއަޅުވާލައްވަމުން، އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފު ވިދާޅުވީ، "މިއަދަކީ އެމްއޭސީއެލް އާއި ރާއްޖޭގެ ހަޔާތުގައި މުހިންމު އަދި އެމްއޭސީއެލްގެ މުވައްޒަފުންނަށް އުފާވެރިކަމެއް ލިބިގެންދާނެ ދުވަހެއް،" ކަމަށެވެ. އަދި އިތުރަށް ވިދާޅުވީ، "މިއީ ރާއްޖޭގައި ފުރަތަމަ ފަހަރަށް ޕަސެންޖަރ ބޯޑިން ބްރިޖަކުން ފަސިންޖަރުން ޓާމިނަލަށް ބޭލޭނެ ގޮތް ކަށަވަރު ކުރެވުނު ދުވަސް" ކަމަށެވެ.

މި ޓްރަޔަލްގައި މޯލްޑިވިއަންގެ އެއާބަސް އޭ330 އަދި އޭ320ގެ މަތިންދާބޯޓުތައް ބޭނުންކޮށްގެން، އާ ޓާމިނަލްގައި ގާއިމުކޮށްފައިވާ 12 އޭރޯ ބްރިޖުގެ ތެރެއިން ދެ ބްރިޖެއް ޓެސްޓު ކުރެވުނެވެ. މީގެއިތުރުން، މަތިންދާބޯޓުތައް ޕާކުކުރުމަށް އެހީތެރިވެދޭ އެޑްވާންސް ވިޝުއަލް ޑޮކިން ގައިޑިންގ ސިސްޓަމް (އޭވީޑީޖީއެސް) ވެސް ކާމިޔާބުކަމާއެކު ޓެސްޓުކުރެވުނެވެ.

މި އައު ސިސްޓަމާއެކު، މިހާރު ފަސިންޖަރުން ބޭލުމަށް ނަގާ 28-35 މިނެޓުގެ ބަދަލުގައި އަށް މިނެޓުގެ ތެރޭގައި ފަސިންޖަރުން ބޭލޭނެއެވެ. މިއީ ފަސިންޖަރުންނަށް ލިބޭ ވަރަށް ބޮޑު ފަސޭހައެކެވެ. އަދި މިކަމުގެ ސަބަބުން މަތިންދާބޯޓުތައް ފުރުވާލުން އަވަސްވެ، އެއާޕޯޓުގެ ޖާގަ ބޭނުންކުރެވޭ މިންވަރު އިތުރުވެ، އިތުރު މަތިންދާބޯޓުތަކަށް ޖާގަ ލިބިގެންދާނެއެވެ.