ވެލާނާ އިންޓަނޭޝަނަލް އެއާޕޯޓަށް އިންޑިއަން އޯޝަންސް ލީޑިންގ އެއާޕޯޓުގެ އެވޯޑު ލިބިއްޖެ

ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ވޯލްޑް ޓްރެވަލް އެވޯޑްސްގެ "އިންޑިއަން އޯޝަންސް ލީޑިންގ އެއާޕޯޓް 2026" ގެ ޝަރަފުވެރި އެވޯޑު ލިބިއްޖެއެވެ. މިއީ ރާއްޖޭގެ މައި ދޮރާއްޓަށް ލިބިގެންދިޔަ އަގުހުރި އަދި ފާހަގަކޮށްލެވޭ ބޮޑު ކާމިޔާބީއެކެވެ.

މި އެވޯޑު ވީއައިއޭއަށް އަރުވާފައިވަނީ 2026 ސެޕްޓެމްބަރު 28 ވީ ދުވަހު ކްރޮސްރޯޑްސް މޯލްޑިވްސްގައި ބޭއްވި "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ" ގައެވެ. މި ރަސްމިއްޔާތުގައި ވެލާނާ އިންޓަނޭޝަނަލް އެއާޕޯޓުގެ ފަރާތުން އެވޯޑާ ހަވާލުވެވަޑައިގަތީ އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދެވެ.

މިއީ އިންޑިއާ ކަނޑުގެ އެންމެ ކުރިއަރާފައިވާ އެއާޕޯޓުގެ ލަގަބު ވީއައިއޭ އިން ކާމިޔާބުކުރި 13 ވަނަ ފަހަރެވެ. މި އެވޯޑު އެއާޕޯޓަށް ލިބިފައި މިވަނީ އެމްއޭސީއެލް އިން އެއާޕޯޓުގެ ޚިދުމަތްތަކާއި ވަސީލަތްތައް އިތުރަށް ތަރައްޤީކޮށް، ދަތުރުވެރިންނަށް ފަސޭހަ މާހައުލެއް ޤާއިމުކުރުމަށް ގިނަގުނަ މަސައްކަތްތަކެއް ކުރަމުންދާ ދަނޑިވަޅެއްގައެވެ.

މި އެވޯޑަށް މި ސަރަޙައްދުގެ މަޝްހޫރު އެހެން އެއާޕޯޓުތައް ވެސް ވާދަކޮށްފައިވެއެވެ. އޭގެ ތެރޭގައި މަޑަގަސްކަރައިގެ އިވާޓޯ އިންޓަނޭޝަނަލް އެއާޕޯޓާއި، ރީޔޫނިއަންގެ ރޯލަންޑް ގަރޮސް އެއާޕޯޓާއި، ސީޝެލްސް އިންޓަނޭޝަނަލް އެއާޕޯޓުގެ އިތުރުން މޮރިޝަސްގެ ސަރ ސީވޫސަގުރް ރާމްގޫލަމް އިންޓަނޭޝަނަލް އެއާޕޯޓް ހިމެނެއެވެ.

މި ކާމިޔާބީއާ ގުޅިގެން އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދު ވިދާޅުވީ، މިއީ މުޅި ޓީމުގެ ބުރަ މަސައްކަތާއި، އެއާޕޯޓަށް ގެންނަމުންދާ ހެޔޮ ބަދަލުތަކުގެ އިތުރުން ކަމާގުޅުންހުރި އެންމެހައި ބައިވެރިންގެ އެއްބާރުލުމުގެ ނަތީޖާ ކަމަށެވެ. އަދި ރާއްޖޭގެ މައި ދޮރާށީގެ ހައިސިއްޔަތުން، ޚިދުމަތުގެ ފެންވަރު މަތިކޮށް، ދަތުރުވެރިންގެ ތަޖުރިބާ ފުރިހަމަކޮށް، ވީއައިއޭ އަކީ ޒަމާނީ، ހަލުވި އަދި ދުނިޔޭގެ ފެންވަރުގައި ވާދަކުރެވޭނެ އެއާޕޯޓަކަށް ހެދުމަށް އަބަދުވެސް މަސައްކަތް ކުރަމުންދާނެ ކަމަށް އޭނާ ވިދާޅުވިއެވެ.

ރާއްޖޭގެ އޭވިއޭޝަން އަދި ފަތުރުވެރިކަމުގެ ސިނާއަތް ކުރިއަރަމުން އަންނައިރު، ވެލާނާ އިންޓަނޭޝަނަލް އެއާޕޯޓަކީ ދުނިޔޭގެ އެކި ކަންކޮޅުތަކުން އަންނަ ދަތުރުވެރިންނަށް ރައްކާތެރި، ފަސޭހަ އަދި ހިތްގައިމު މާހައުލެއް ފޯރުކޮށްދޭ ތަނަކަށް ހެދުމުގައި އެމްއޭސީއެލް ދެމިއޮންނާނެ ކަމަށް އެ ކުންފުނިން ހާމަކުރެއެވެ.