މިދިޔަ އެޕްރީލް މަހުގެ 18 ވަނަ ދުވަހު މާލޭގެ އިމާރާތެއްގެ މަތިން ވެއްޓުނު ހައްވާ ޔުމްނު ރަޝީދުގެ މައްސަލަ ތަހުގީގުކުރަން ރައީސް ޑރ. މުހައްމަދު މުއިއްޒު އުފެއްދެވި ރިޔާސީ ކޮމިޝަނުގެ މަސައްކަތް ނިމުމުން އެ ކޮމިޝަން މިއަދު އުވާލައްވައިފި އެވެ. 

ރައީސް އޮފީހުން ބުނީ އެ ހާދިސާ ތަހުގީގުކުރަން އުފެއްދެވި ހާއްސަ ކޮމިޝަން ރައީސް ޑރ. މުއިއްޒު އުވާލައްވާފައި ވަނީ، ރިޔާސީ ކޮމިޝަންތަކުގެ ގާނޫނުގައިވާ ގޮތުގެ މަތީން، އެކަމަށްޓަކާ ނެރުއްވި ގަރާރަކުން ކަމަށެވެ.

އެ މައްސަލަ ތަހުގީގުކުރަން ރައީސް ރިޔާސީ ކޮމިޝަނެއް އުފެއްދެވީ މިދިޔަ އެޕްރީލް މަހުގެ 27 ވަނަ ދުވަހު އެވެ.

ރައީސް އެ ކޮމިޝަނަށް މަތިކުރެއްވީ، ޔުމްނު ވެއްޓިފައި އޮއްވައި ފެނުނު މައްސަލަ ބަލައި، އެ މައްސަލައާ ގުޅިގެން މިނިވަން، މުސްތަގިއްލު އަދި އިތުބާރު ހިފޭ ތަހުގީގެއްކޮށް، އެ ހާދިސާގެ ހަގީގަތް ހޯދައި، އެ ހާދިސާއާ ގުޅިގެން ކަމާ ބެހޭ މުއައްސަސާތަކުން މިހާތަނަށް ކޮށްފައިވާ މަސައްކަތްތަކީ ކޮބައިކަން ބެލުމަށެވެ.

އެ މައްސަލައާ ގުޅިގެން އަޅަން ޖެހޭ ފިޔަވަޅުތައް އަޅައި، އެ މައްސަލާގައި ކަންހިނގާފައިވާ ގޮތުގެ ތަހުގީގެއް އިންސާފުވެރިކަމާއި އަދުލުވެރިކަމާއެކީ ކޮށް، ރައީސަށް ލަފާއެރުވުމަށް ވެސް އެ ކޮމިޝަނަށް މަތިކުރެއްވި އެވެ.

އެ ކޮމިޝަނުން އެކުލަވާލި ތަހުގީގީ ރިޕޯޓު އާންމުކުރީ މިދިޔަ ޖޫން މަހުގެ 17 ވަނަ ދުވަހު އެވެ.

ކޮމިޝަންގެ ރިޕޯޓުގައި ފާހަގަކުރައްވާފައިވާ ކަންކަން ތަންފީޒުކުރުމަށާއި އަޅަން ޖެހޭ ފިޔަވަޅުތައް އެޅުމަށް ހޯމް މިނިސްޓްރީ އަށާއި ހެލްތު މިނިސްޓްރީއަށް ރައީސް ވަނީ އަންގަވައިފަ އެވެ.

އެ ކޮމިޝަނުގެ މެމްބަރުންގެ ގޮތުގައި ތިއްބެވީ ކުރީގެ ބަންޑާރަ ނައިބު ޑރ. މުހައްމަދު މުނައްވަރާއި ބްރިގޭޑިއާ ޖެނެރަލް ރިޓަޔާޑް އަހުމަދު މުހައްމަދާއި ޑރ. މޫސާ މުރާދާއި ޖަބީން މުހައްމަދާއި އައިމިނަތު އީނާސް އެވެ. އެ ކޮމިޝަންގެ ރައީސަކަށް ހުންނެވީ މުނައްވަރެވެ.