އިޒްރޭލުގެ ޒަޔަނިސްޓުން އިއްޔެ ޣައްޒާގައި ދިން ހަމަލާތަކުގައި، މަދުވެގެން 110 މީހުން ޝަހީދުވެއްޖެއެވެ. އޭގެ ތެރޭގައި، އެމެރިކާގެ އެހީގައި ހިންގާ ޣައްޒާ ހިއުމަނިޓޭރިއަން ފައުންޑޭޝަން (ޖީ.އެޗް.އެފް) ގެ ދެކުނު ރަފަޙްގައި ހުންނަ ސައިޓެއްގައި ކާބޯތަކެތީގެ ހޯދުމަށްޓަކައި އާދެސް ކުރަމުންދިޔަ 34 މީހުން ވެސް ހިމެނެއެވެ. އެ މީހުނގެ ގަޔަށް ބަޑިޖަހައި ޝަހީދު ކޮށްލީ ކަމަށް މަސްދަރުތަކުން ބުނެއެވެ.
މަންޒަރު ދުށް މީހުންނާއި ޙަވާލާދީ އަލްޖޒީރާއިން ބުނި ގޮތުގައި، އަލް-ޝަކޫޝް ޖީ.އެޗް.އެފް ގެ ސައިޓަށް ކާނާ ހޯދުމަށް އެއްވެފައި ތިބި އާންމުންނަށް ޓާގެޓް ކޮށް ޒައެނިސްޓުންގެ ސިފައިން ބަޑި ޖެހިއެވެ. ޙަމަލާއިން ސަލާމަތްވި މީހުން ސިފަކުރި ގޮތުގައި ކާބޯތަކެތި ހިފައިގެން ކޮތަޅަކަށް އަޅައިގެން ގެއަށް ދިޔުމުގެ ބަދަލުގައި 34 މީހުންގެ ކަފުން ކޮތަޅުތަކަށް ބަދަލުވެފައިވާ ކަމަށެވެ.
ޚާން ޔޫނިސްގައި ހުންނަ ނާސިރު ހޮސްޕިޓަލުގައި، ޙަމަލާއިން ސަލާމަތްވި ބައްޕައެއް ކަމަށްވާ މުޙައްމަދު ބަރްބަޚްއާއި ޙަވާލާދީ އޭއެފްޕީން ބުނި ގޮތުން ސިފަ ކުރެވެނީ، އިސްރާއީލުގެ ސިފައިން ވަނީ ޣައްޒާގެ ބަނޑުހައިހޫނުކަމުގައި ތިބި ރައްޔިތުން ކާއެއްޗެހިތައް ހޯދަން އެހީ ބަހާ ސައިޓުތަކަށް ދިޔުމަށް ދޫކޮށްލާފައެވެ. އަދި އެ ސައިޓަށް އެހީ ހޯދަން ދިޔުމާއެކު ވަލުޖަނަވާރެއް ޝިކާރަކޮށްލާހެން ޝިކާރަ ކޮށްލަނީއެވެ.
Advertisement
ކުރުކޮށް ބުނާނަމަ މިހާރު އެހީ ބަހާ ޖީ.އެޗް.އެފް ސައިޓަކީ ޣައްޒާ ރައްޔިތުން ޝަހީދު ކޮށްލުމަށްޓަކައި ހަދައިގެން އުޅޭ ތަނެއް ކަމަށް ސިފަ ކުރެވެއެވެ. މިހާތަނަށް 798 މީހުން ވަނީ އެމެރިކާއިން ޣައްޒާގައި ހިންގާ މިދެންނެވި އެހީ ބަހާ ސައިޓުން ޝަހީދުކޮށްލާފައެވެ. އ.ދ. ގެ އޮފިޝަލުންނާއި އިންސާނީ ޙައްޤުތަކަށް ވަކާލާތުކުރާ ޖަމިއްޔާތަކުން ވެސް ބުނެފައި ވަނީ ޖީ.އެޗް.އެފް ސައިޓަށްދާ ޢާންމުންނަށް ޓާގެޓް ކޮށް ތަކުރާކޮށް ޙަމަލާތައް ދެމުންދާ ކަމަށެވެ. އެ މީހުން ވެސް އެތަން ސިފަކުރަނީ މަރުގެ ދަންތުރައެއްގެ ގޮތުގައެވެ.
ރަފަޙްގެ ޤަތުލުއާންމުގެ އިތުރުން، އިޒްރޭލުން އެޅި ބޮން ތަކުގައި ޣައްޒާ ސިޓީން 14 މީހުންނާއި، ޖަބާލިޔާއިން 15 މީހުން، ޝާތީ ރެފިއުޖީ ކޭމްޕުން 7 މީހުން، އަދި ބައިތު ޙަނޫނުން އެތައް ބަޔަކު ޝަހީދުވިއެވެ. ބައިތު ޙަނޫނަށް އެކަނި 50 ބޮން އެޅިއެވެ.
ޣައްޒާ މީޑިއާ އޮފީހުން ރިޕޯޓުކުރި ގޮތުގައި، ކާނާ ނުލިބުމުގެ ސަބަބުން 67 ކުދިން ޝަހީދުވެފައިވާއިރު، 5 އަހަރުން ދަށުގެ 650,000 ކުދިން ކާނާ ނުލިބުމުގެ ސަބަބުން ޝަހީދުވާނެ ކަމުގެ ނުރައްކާ އެބައޮތެވެ.
