އިސްރާއީލުގެ ހަމަލާތައް ފޭލިގެތަކާއި ޤަބުރުސްތާނުތަކަށް، 59 މަރު

އިޒްރޭލްގެ ސިފައިން، ޣައްޒާގެ ދެކުނުގެ ޚާން ޔޫނިސްގައި ވަގުތީ ހިޔާވަހިކަން ހޯދައިގެން ތިބި ފަލަސްތީނުގެ ރެފިއުޖީންނަށް އަމާޒުކޮށް އެއްގަމާއި ވައިގެ މަގުން ޙަމަލާ ދޭން ފަށައިފިއެވެ. މި ޙަމަލާތަކުގައި ފާއިތުވި 24 ގަޑިއިރު 59 މީހުން ޝަހީދު ކޮށްލާފައި ވެއެވެ. އަދި އެތައް ފޭލިގެއެއް ވަނީ ހަލާކު ކޮށްލާފައެވެ. މީގެ އިތުރުން އެ ސަރަހައްދުގައި ހުރި އެތައް ގަބުރުސްތާނަކަށް ވެސް އިސްރާއީލުން ވަނީ ޙަމަލާ ދީ ބޮޑެތި ގެއްލުންތައް ދީފައެވެ.

އިންސާނީ ހައްގުތަކަށް މަސައްކަތްކުރާ ފަރާތްތަކުން ބުނާ ގޮތުގައި، ޣައްޒާގައި ހުންނަ ޤަޠަރު ކޭމްޕް ސަރަހައްދަށް ދިން ޙަމަލާތަކުގައި އެތަނުގައި ތިބި ފޭލިގެތައް ވައްޓައި ހަލާކުކޮށް އެކި ދިމަދިމާއަށް ވަނީ ހޫރާލާފައެވެ.

2023 ވަނަ އަހަރުން ފެށިގެން، ހަނގުރާމަ ހޫނުވީފަހުން އެތައް ސަތޭކަ އާންމުންނެއް ވަޅުލާފައިވާ ޣައްޒާގައި ހުންނަ ތުރުކީ ގަބުރުސްތާނުގައި ގިނަ އަދަދެއްގެ ގަބުރުތައް ހަލާކުވެފައިވާ ކަމަށާއި “މަރުވެފައިވާ މީހުންނަށް ވެސް މިހާރު ރައްކާތެރިކަމެއް ނެތް” ކަމަށް ޚަބަރުތައް ބުނެއެވެ.

މިހާރު 644 ދުވަސް ވެފައިވާ ޣައްޒާގެ ޤަތުލުޢާންމުގައި ލައްކައަކަށްވުރެ ގިނަ މީހުން ވަނީ ދުނިޔޭ ދޫކޮށްފައި ކަމަށް ހަމާސް އިން ދަނީ ބުނަމުންނެވެ.