ގުޅީފަޅުގެ ލޭންޑް ޔޫސް ޕްލޭނަށް ގެނައި ބަދަލާ ގުޅިގެން، ގުރުއަތު ނެގުމަށްފަހު ގޯތި ލިބިފައިވާ ފަރާތްތަކަށް ރަޖިސްޓްރީ ދޫކުރަން މިއަދު ފަށައިފިއެވެ.

އިމާރާތްކުރުމާއި، ގެދޮރުވެރިކަމާއި ބިނާރާބެހޭ ވުޒާރާއިން ބުނީ ރަޖިސްޓްރީ ދޫކުރުމުގެ މަސައްކަތް ކުރިއަށްދަނީ އެ ވުޒާރާ ކުރިން ހިންގި އިމާރާތުގެ ބިމުގައި ކަމަށެވެ.

އައު ރަޖިސްޓްރީގައި ސޮއިކުރުމުގެ މަސައްކަތް ކުރިއަށްގެންދަނީ އެޕޮއިންޓްމަންޓް އުސޫލުންނެވެ. އެގޮތުން ހިޔާވަހި ޕޯޓަލް މެދުވެރިކޮށް ރަޖިސްޓްރީ ބަލައިގަތުމަށް އެޕޮއިންޓްމަންޓް ހެއްދުމުގެ އިންތިޒާމް ވުޒާރާއިން ވަނީ ހަމަޖައްސާފައެވެ.

ރަޖިސްޓްރީއާ ހަވާލުވުމަށް އެޕޮއިންޓްމަންޓް ހަމަޖެހޭ ފަރާތްތަކަށް ހިޔާވަހި ޕޯޓަލް އަދި އެސްއެމްއެސް މެދުވެރިކޮށް ހާޒިރުވާންޖެހޭ ގަޑިއާއި ތަން އަންގާނެ ކަމަށް ވުޒާރާއިން ބުނެފައިވެއެވެ.

އެޕޮއިންޓްމަންޓް ގަޑިއަށްވުރެ ފަސް މިނެޓު ލަސްވެ ހާޒިރުވާ ފަރާތްތަކާއި، ބޭނުންވާ ލިޔެކިޔުންތައް ފުރިހަމަ ނުކޮށް ހާޒިރުވާ ފަރާތްތަކުން އެޕޮއިންޓްމަން ކެންސަލްވާނެ ކަމަށް ވުޒާރާއިން ބުނެފައިވެއެވެ. އަދި އެ ފަރާތްތަކަށް އެހެން ތާރީހަކާއި ގަޑިއަކަށް އެޕޮއިންޓްމަންޓަށް އެދުމުގެ ފުރުސަތު ލިބިގެންދާނެ ކަމަށް ވުޒާރާއިން ބުންޏެވެ.

ވުޒާރާއިން ބުނެފައިވަނީ ރަޖިސްޓްރީއާ ހަވާލުވުމަށް އަންނަ އިރު ގޯތި ލިބިފައިވާ ފަރާތުގެ އައިޑީ ކާޑުގެ އަސްލު ގެންނަން ޖެހޭނެ ކަމަށެވެ. އަދި ބަދަލުގައި ފަރާތެއް އަންނަ ނަމަ ޕަވާ އޮފް އެޓާނީގެ އަސްލާއި ޕަވާ އޮފް އެޓާނީ ލިބިފައިވާ ފަރާތުގެ އައިޑީ ކާޑުގެ އަސްލު ގެންނަން ޖެހޭނެ ކަމަށް ވުޒާރާއިން ބުނެފައިވެއެވެ.

މީގެ އިތުރުން، ވުޒާރާއާއި ގޯތި ލިބޭ ފަރާތާ ދެމެދު ކުރިން ސޮއިކޮށްފައިވާ ބަންޑާރަ ގޯތި ދޫކުރުމުގެ އެއްބަސްވުމާއި، ކުރިން ދޫކޮށްފައިވާ ބަންޑާރަ ގޯތީގެ ރަޖިސްޓްރީގެ އަސްލުވެސް ގެންނަން ޖެހޭނެ ކަމަށް ވުޒާރާއިން ބުނެފައިވެއެވެ.

ގުޅިފަޅުގެ ލޭންޑް ޔޫސް ޕްލޭނަށް ގެނައި ބަދަލާ ގުޅިގެން، ކުރިން ގޯތި ލިބި ރަޖިސްޓްރީ ދޫކުރި ޕްލޮޓްތައްވެސް ވަނީ ބަދަލުވެފައެވެ.

ގޯތި ލިބޭ ފައިނަލް ޕްލޮޓުތައް ކަނޑައަޅާފައިވަނީ މިދިޔަ މެއި މަހުގެ 30 ވަނަ ދުވެހު އުސްފަސްގަނޑު ސަރަހައްދުގައި ބޭއްވި ގުރުއަތުލުމުގަ އެވެ.