ރަސްމާލެ މަޝްރޫއުގެ ދަށުން ޔޫއޭއީގެ މަޝްހޫރު ކުންފުނި އީގަލް ހިލްސް އިން ކުރިއަށްގެންދިއުމަށް ހުށަހަޅާފައިވާ ބޮޑު އިންވެސްޓްމަންޓްގެ ތަފްސީލުތައް ދިވެހި ސަރުކާރުން ހާމަކޮށްފިއެވެ. މި މައުލޫމާތުތަކުގައި މަޝްރޫއުގެ ދާއިރާއާއި، ދައުލަތަށް ލިބޭނެ އާމްދަނީގެ އިންތިޒާމުތަކުގެ އިތުރުން ބިމުގެ މިލްކުވެރިކަމާ ގުޅޭ ހާއްސަ ޝަރުތުތައް ހިމެނެއެވެ.
މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އާބަން ޑިވެލޮޕްމަންޓުން ހާމަކޮށްފައިވާ ގޮތުގައި، ރަސްމާލެއިން މިހާރު ހިއްކާފައިވާ ބިމުގެ ތެރެއިން ގާތްގަނޑަކަށް 500 ހެކްޓަރުގެ ސަރަހައްދެއްގައި "މޯލްޑިވްސް ވޯޓަރފްރަންޓް އެންޑް މެރީނާ" ގެ ނަމުގައި ތަރައްޤީކުރާ މިކްސްޑް-ޔޫސް ވޯޓަރފްރަންޓް މަޝްރޫއުގެ މާސްޓަރ ޑިވެލޮޕަރަކީ އީގަލް ހިލްސްއެވެ.
ސަރުކާރުން ލަފާކުރާ ގޮތުގައި މި މަޝްރޫއަކީ ތަރައްގީގެ އިންވެސްޓްމަންޓެއްގެ ގޮތުގައި ގާތްގަނޑަކަށް 20 ބިލިއަން ޔޫއެސް ޑޮލަރު ހިމެނޭ އަދި މަޝްރޫއުގެ މުއްދަތުގައި 30 ބިލިއަން ޑޮލަރަށް ވުރެ ގިނަ ފޮރިން ޑައިރެކްޓް އިންވެސްޓްމަންޓް (އެފްޑީއައި) ރާއްޖެއަށް ގެނެސްދޭނެ މަޝްރޫއެކެވެ.
Advertisement
މި މަޝްރޫއުގައި މީހުން ދިރިއުޅޭ އިމާރާތްތަކާއި، ހޮޓާތަކާއި ރިޒޯޓްތައް، މެރީނާއެއް، ވިޔަފާރި މަރުކަޒުތައް، އޮފީސްތައް އަދި ތަޢުލީމާއި ސިއްހީ ހިދުމަތް ފަދަ އިޖުތިމާއީ ވަސީލަތްތައް ހިމެނޭނެއެވެ. އެކި ފިޔަވަހިތަކަކަށް ބަހާލައިގެން ކުރިއަށްގެންދާ މި މަޝްރޫއު ފުރިހަމަވުމަށް ގާތްގަނޑަކަށް 10 އަހަރު ދުވަސް ނަގާނެ ކަމަށް ލަފާކުރެވެއެވެ. ރަސްމާލެއިން ބާކީ އޮތް 500 އެއްހާ ހެކްޓަރުގެ ބިން ހާއްސަކޮށްފައިވަނީ ދިވެހިންގެ ބޯހިޔާވަހިކަމަށެވެ. އެ ސަރަހައްދަކީ 150،000 އަށް ވުރެ ގިނަ ރައްޔިތުންނަށް ދިރިއުޅެވޭނެ ޖާގައެވެ.
މި އެއްބަސްވުމުގެ ދަށުން، ހުޅުމާލޭގައި 500 މިލިއަން ޑޮލަރު (ގާތްގަނޑަކަށް 7.7 ބިލިއަން ދިވެހި ރުފިޔާ) ހަރަދުކޮށްގެން 3 ކޮޓަރީގެ 5،000 ހައުސިންގ ޔުނިޓް އެޅުމުގެ މަސައްކަތް އީގަލް ހިލްސް އިން ފައިނޭންސްކޮށް، ތަރައްގާކުރާނެއެވެ. ސަރުކާރުން ބުނީ މި ހައުސިންގ ޔުނިޓްތަކަކީ ޑިވެލޮޕަރުގެ ވިއްކުންތަކުން ދައުލަތަށް ލިބޭ %10 ގެ ހިއްސާގެ އެޑްވާންސް ޕޭމަންޓެއްގެ ގޮތުގައި ހަމަޖެހިގެންދާ ބައެއް ކަމަށާއި، މީގެ ސަބަބުން ސަރުކާރުން އެއްވެސް ލޯނެއް ނަގަން ނުޖެހޭނެ ކަމަށާއި އަދި ސޮވްރިން ގެރެންޓީއެއް ވެސް ދޭން ނުޖެހޭނެ ކަމަށެވެ.
ވިޔަފާރީގެ އިންތިޒާމުތަކަށް ބަލާއިރު، އެ ސަރަޙައްދުގައި ހިނގާ ވިޔަފާރިތަކުން ދައުލަތަށް ޓީޖީއެސްޓީ ލިބޭނެއެވެ. އަދި ފުރަތަމަ ފަހަރަށް ވިއްކާ އަދި ކުއްޔަށްދޭ ތަންތަނުން ޑިވެލޮޕަރަށް ލިބޭ އާމްދަނީގެ %10 ދައުލަތަށް ލިބޭއިރު، ފުރަތަމަ ވިއްކުމާއި އޭގެ ފަހުން ހިނގާ ކޮންމެ މުޢާމަލާތަކުން މުދަލުގެ އަގުގެ %4 ގެ ފީއެއް ގަންނަ ފަރާތުން ދައުލަތަށް ދައްކަންޖެހޭނެއެވެ.
މަޝްރޫއު ނިމި ފުރިހަމަވުމުން، އަހަރަކު އެއް މިލިއަނަށް ވުރެ ގިނަ ފަތުރުވެރިން ޒިޔާރަތްކުރާނެ ކަމަށާއި، އިގްތިސާދަށް އަހަރަކު 2 ބިލިއަން ޑޮލަރުގެ ފަތުރުވެރިކަމުގެ އާމްދަނީއެއް ވަންނާނެ ކަމަށް ލަފާކުރެވެއެވެ. އަދި 54،000 އަށް ވުރެ ގިނަ ވަޒީފާގެ ފުރުސަތު އުފެދި، މަޝްރޫއުގެ މުއްދަތުގައި ދައުލަތަށް 11 ބިލިއަން ޑޮލަރަށް ވުރެ ބޮޑު އާމްދަނީއެއް ލިބޭނެ ކަމަށް ވެސް ސަރުކާރުގެ ހިސާބުތަކުން ދައްކައެވެ.
މީގެއިތުރުން، މި މަޝްރޫއުގެ ދަށުން ވިއްކާ ތަންތަނުގެ ފައިސާ ބަހައްޓާނީ ރާއްޖޭގެ އެސްކްރޯ އެކައުންޓެއްގައި ކަމަށާއި، ހުރިހާ ފައިސާގެ މުޢާމަލާތްތައް ހިނގާނީ ރާއްޖޭގެ ބޭންކުތައް މެދުވެރިކޮށް ކަމަށް މިނިސްޓްރީން ބަޔާންކުރެއެވެ.
ސަރުކާރުން ވަނީ މި އެއްބަސްވުމުގެ ދަށުން އީގަލް ހިލްސްއަށް ރާއްޖޭގެ ބިން މިލްކުކޮށް ނުދެވޭނެ ކަމުގެ ޔަގީންކަން ދީފައެވެ. ބިން ދޫކުރެވޭނީ ގިނަވެގެން 99 އަހަރުގެ މުއްދަތަކަށް ކުއްޔަށެވެ. އަދި އެއްވެސް މުދަލެއް އެހެން ފަރާތަކަށް ބަދަލުކުރެވޭނީ ސަރުކާރުގެ ހުއްދައާއެކު، ކުރީގެ ކުލީގެ އެއްބަސްވުން ބާޠިލުކޮށް އައު އެއްބަސްވުމެއް ހަދައިގެން، %4 ގެ ފީއެއް ދެއްކުމަށްފަހުގައެވެ.
މި މަޝްރޫއުގެ ދަށުން ތަންތަން ގަންނަ ބޭރުގެ ފަރާތްތަކަށް ރާއްޖޭގެ ރަށްވެހިކަން ނުވަތަ ޕާމަނަންޓް ރެސިޑެންސީ އޮޓޮމެޓިކުން ލިބޭނެ އެއްވެސް އުސޫލެއް ނޯންނާނެ ކަމަށާއި، ރާއްޖޭގެ ޤާނޫނުތަކާއި އިމިގްރޭޝަންގެ ހުރިހާ ޤަވާޢިދުތަކެއް އެ ސަރަހައްދުގައި އެއްވެސް އިސްތިސްނާއެއް ނެތި ހިނގާނެ ކަމަށް ސަރުކާރުން ވަނީ ހާމަކޮށްފައެވެ.
