އިމާރާތްކުރުމުގެ ގާނޫނުގެ ދަށުން އެކުލަވާލާފައިވާ ގަވާއިދުތަކަށް އާންމުންނާއި އެ ދާއިރާގައި މަސައްކަތްކުރާ ހުރިހާ ފަރާތްތައް އަހުލުވެރިކުރުމުގެ ގޮތުން، މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން ކުރިއަށްގެންދާ އޮންލައިން ޕްރޮގްރާމްގެ ދެވަނަ ބައި އޮކްޓޯބަރު މަހުގެ 11 އިން 15 އަށް ބޭއްވުމަށް ހަމަޖައްސައިފިއެވެ.
މިނިސްޓްރީން އިސްނަގައިގެން މިއަހަރު ދެ ބަޔަކަށް ބަހާލައިގެން ކުރިއަށްގެންދާ މި ޕްރޮގްރާމުގެ މައިގަނޑު މަގްސަދަކީ އިމާރާތްކުރުމުގެ ގާނޫނާއި އެ ގާނޫނުގެ ދަށުން ހަދާފައިވާ ގަވާއިދުތަކަށް ކަމާގުޅުންހުރި ފަރާތްތައް އަހުލުވެރިކުރުވުމެވެ. މި ސެޝަންތަކުގައި، ޢިމާރާތްކުރުމުގެ މަސައްކަތްތަކާ ގުޅުންހުރި ހުއްދަތައް ދިނުމާއި، ކުރެހުން ފާސްކުރުމުގެ ކަންކަމުގެ އިތުރުން ގަވާއިދާ ހިލާފުވާ ފަރާތްތަކާ މެދު އަމަލުކުރަން އޮންނަ އުސޫލުތަކާ ގުޅޭ މުހިންމު މައުލޫމާތުތައް ފޯރުކޮށްދެވޭނެއެވެ.
މި ޕްރޮގްރާމުގައި ބައިވެރިވެވަޑައިގެންނެވުމަށް ބޭނުންފުޅުވާ ފަރާތްތަކަށް މިހާރު ވަނީ އެ ފުރުސަތު ހުޅުވާލާފައެވެ. މި ޕްރޮގްރާމުގައި ބައިވެރިވުމަށްޓަކައި ސެޝަން ފެށުމުގެ އެންމެ ލަސްވެގެން އެއްދުވަސް ކުރިން މިނިސްޓްރީގެ ގޫގުލް ފޯމް ލިންކު މެދުވެރިކޮށް ރެޖިސްޓްރޭޝަން ފުރިހަމަކުރަން ޖެހެއެވެ.
Advertisement
މިކަމާ ގުޅޭ އިތުރު މައުލޫމާތު ހޯއްދެވުމަށް 7256557 ފޯނު ނަންބަރަށް ގުޅުއްވުމަށް ނުވަތަ development.cidd@infrastructure.gov.mv އަށް އީ-މެއިލް ކުރެއްވުމަށް މިނިސްޓްރީން އެދިފައިވެއެވެ.
