ކުޅިވަރުގެ ވަސީލަތްތައް ބިނާކުރުމާއި، ތަމްރީން ޕްރޮގްރާމުތައް ފަހިކުރުމާ ބެހޭގޮތުން ސައުދީ އަރަބިއްޔާގެ ސަރުކާރުން ދިވެހިރާއްޖެއަށް ކަނޑައެޅުއްވި އާ ސަފީރު ޔަހްޔާ ހަސަން އަލްގަހްތާނީ އާއި ސްޕޯޓްސް މިނިސްޓަރު އަބްދުﷲ ރާފިއު މަޝްވަރާކުރައްވައިފި އެވެ.
ސްޕޯޓްސް މިނިސްޓްރީ އިން ބުނީ އެ ވުޒާރާގައި އޮތް މި ބައްދަލުވުމުގައި ކޮމިޝަނާ އޮފް ސްޕޯޓްސް މުހައްމަދު ތޮލާލް އަދި ކުޅިވަރު ވުޒާރާގެ ޕާމަނަންޓް ސްކެޓްރީ އަހުމަދު ޝިޔާއުވެސް ބައިވެރިވެވަޑައިގެންނެވި ކަމަށެވެ.
އަދި މި ބައްދަލުކުރެއްވުމުގައި ކުޅިވަރުގެ ރޮނގުން ދެ ގައުމުގެ ގުޅުން ވަރުގަދަކުރުމާއި ގުޅޭގޮތުން މަޝްވަރާކުރެވުނު ކަމަށާއި މިނިސްޓަރު ރާފިއު ވަނީ ސަރުކާރުގެ ކުޅިވަރުގެ ތަސައްވުރާ ގުޅޭ މައުލޫމާތު ސަފީރާ ހިއްސާކުރައްވާފައި ކަމަށް މިނިސްޓްރީން ބުންޏެވެ. އެގޮތުން ކުޅިވަރުގެ ދިގު ރާސްތާ ޕްލޭންގައި ސާކް ސަރަހައްދުން ބޭރުން ކާމިޔާބީ ހޯދަން ކުރާ މަސައްކަތްތައްވެސް މިނިސްޓަރު ތަފްސީލްކޮށްދެއްވި ކަމަށް މިނިސްޓްރީ އިން ބުންޏެވެ.
މިނިސްޓްރީން އިތުރަށް ބުނިގޮތުގައި ރާއްޖޭގެ ކުޅިވަރު ކުރިއެރުވުމަށް ސަރުކާރުން ކުރާ މަސައްކަތްތަކަށް ފުރިހަމަ އެއްބާރުލުން ދެއްވާނެކަން ހާމަކުރައްވަމުން ސަފީރު ޔަހްޔާ ހަސަން އަލްގަހްތާނީ ވަނީ ކުޅިވަރުގެ ރޮނގުން ދިވެހިރާއްޖެއަށް ބޭނުންވާ އެހީތެރިކަން ފޯރުކޮށްދެއްވާނެކަމަށް ވިދާޅުވެފަ އެވެ. އަދި ރާއްޖޭގެ ސަރުކާރުން ކުޅިވަރަށް ދެއްވާ އަހަމިއްޔަތު ފާހަގަކުރައްވާ އެކަމަށް މަރުހަބާ ދަންނަވާފައިވާ ކަމަށް މިނިސްޓްރީ އިން ބުންޏެވެ.
އޭގެ އިތުރުން ދިވެހިރާއްޖޭގެ ރައްޔިތުންނަކީ ކުޅިވަރަށް ލޯބިކުރާ ބައެއްކަމަށާއި، އެކި ކުޅިވަރުތަކުގައި ހުނަރުވެރި ކުޅުންތެރިން ރާއްޖޭގައި އެބަތިބިކަން ސަފީރު ފާހަގަކުރެއްވި ކަމަށާއި އެ ކުޅުންތެރިންގެ ހުނަރު ތަރައްގީކޮށް، ކާމިޔާބީތައް ހޯދުމަށް އެހީތެރިވެވޭނެ ގޮތްތަކާ ގުޅޭގޮތުންވެސް މި ބައްދަލުވުމުގައި މަޝްވަރާކުރެއްވި ކަމަށް މިނިސްޓްރީން ވަނީ ބުނެފަ އެވެ.
