މޯލްޑިވްސް ޒަކާތު ހައުސްއިން މި އަހަރުގެ ފުރަތަމަ ހަމަސް ދުވަހުގެ ތެރޭގައި 590 މީހެއްގެ ބޭސްފަރުވާއަށް އެހީތެރިވެ، 8.4 މިލިއަނަށް ވުރެ ގިނަ ރުފިޔާ ހޭދަކޮށްފައިވާ ކަމަށް އެ މުއައްސަސާއިން ހާމަކޮށްފިއެވެ. މި އެހީތެރިކަން ފޯރުކޮށްދެވިފައިވަނީ ޒަކާތު ފަންޑުންނެވެ.
ޒަކާތު ފަންޑުން ހާމަކުރި ތަފާސްހިސާބުތަކުން ދައްކާގޮތުގައި، މި އަހަރުގެ ފުރަތަމަ ހަމަސް ދުވަހުގެ ތެރޭގައި އެންމެ ގިނަ ފައިސާ ހޭދަކޮށްފައިވަނީ ކެންސަރު ބަލީގެ ފަރުވާއަށެވެ. އެގޮތުން ކެންސަރު ބަލީގެ ފަރުވާއަށް އެކަނި 2.3 މިލިއަން ރުފިޔާ ވަނީ ހޭދަކޮށްފައެވެ.
އެގޮތުން، މި އަހަރުގެ މެއި މަހަކީ ބޭސްފަރުވާއަށް އެންމެ ގިނަ ފައިސާ ހޭދަކުރެވުނު މަހެވެ. އެގޮތުން މެއި މަހު އެކަނި 3.9 މިލިއަން ރުފިޔާ ބޭސްފަރުވާއަށް ހޭދަކޮށްފައިވެ އެވެ. އަދި އޭޕްރީލް އަދި ޖޫން މަހު ވެސް ކޮންމެ މަހަކު 1.1 މިލިއަން ރުފިޔާ ހޭދަކޮށްފައިވާއިރު، އަހަރުގެ ފުރަތަމަ ތިން މަހު ކޮންމެ މަހަކު އެވްރެޖްކޮށް 7.8 ލައްކަ ރުފިޔާ ހޭދަކޮށްފައިވެ އެވެ.
ބޭސްފަރުވާގެ އިތުރުން، ޒަކާތު ފަންޑުން ވަނީ އެހެނިހެން ދާއިރާތަކަށްވެސް އެހީތެރިކަން ފޯރުކޮށްދީފަ އެވެ. މީގެ ތެރޭގައި ފަގީރުންނާއި މިސްކީނުންނަށް ޒަރޫރީ އެހީގެ ގޮތުގައި 110,000ރ، ގުރުއާން ހިތުދަސްކުރުމާއި އިސްލާމީ އިލްމު ފެތުރުމަށް 2.3 މިލިއަން ރުފިޔާ ހިމެނެއެވެ. އަދި ދީނީ ޕްރޮގްރާމްތަކަށް 1.66 މިލިއަން ރުފިޔާ ހޭދަކޮށްފައިވެ އެވެ.
ޒަކާތު ހައުސްއަކީ ދިވެހިރާއްޖޭގައި އިސްލާމީ ޝަރީއަތާ އެއްގޮތްވާ ގޮތުގެމަތިން ޒަކާތުގެ މުދާ އެއްކޮށް، އެކަމަށް ހައްގުވާ ފަރާތްތަކަށް ބެހުމުގެ މަސައްކަތް ކުރަމުންދާ މުއައްސަސާއެކެވެ. މި މުއައްސަސާއިން ކުރާ މަސައްކަތްތަކުގެ ތެރޭގައި ޒަކާތުގެ އިލްމު ފެތުރުމާއި، ޒަކާތުގެ ހުކުމްތަކާމެދު އާންމުން ހޭލުންތެރިކުރުވުން ހިމެނެ އެވެ. މިގޮތުން ޒަކާތު ފަންޑުން ފޯރުކޮށްދޭ އެހީތެރިކަމަކީ ރާއްޖޭގެ ރައްޔިތުންގެ މެދުގައި އިޖުތިމާޢީ އެއްބައިވަންތަކަން ބިނާކުރުމަށް އެޅޭ މުހިންމު ފިޔަވަޅެކެވެ.
