ލިޔުންތެރިކަމަކީ ގައުމުގެ އިޖުތިމާއީ ފޭރާން ހެޔޮވަރުކޮށްދޭ، ގައުމީ ތަރިކައެއް ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު ވިދާޅުވެއްޖެއެވެ.
ވަޒީރު މިހެން ވިދާޅުވެފައިވަނީ މިއަދު ފާހަގަކުރަމުންދާ ރާއްޖޭގެ ލިޔުންތެރިންގެ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައެވެ.
މި ޕޯސްޓްގައި ލިޔުންތެރިންގެ ގަލަމަކީ ހަތިޔާރެއްކަމަށާއި، އެ ހަތިޔާރުގެ ބޭނުން ހިފަންވާނީ މުޅި ގައުމުގެ ހެވާއި، ލާބައަށް ކަމަށް ވަޒީރު ބަޔާންކުރައްވާފައި ވެއެވެ. އަދި ދިވެހި ލިޔުންތެރިން ގައުމަށްޓަކައި ބޮޑެތި ގުރުބާނީތަކެއް ވެފައިވާކަމުގެ ޒިކުރާ އައުކޮށް، މިއަދުވެސް ލިޔުންތެރިން ކުރައްވަމުންގެންދަވައި ހިދުމަތުގެ އަގު ވަޒަން ކުރައްވާ ކަމަށް ވަޒީރުގެ ޕޯސްޓުގައި ހާމަކުރައްވާފައިވެއެވެ.
ވަޒީރު ކުރައްވާފައިވާ ޕޯސްޓް ނިންމަވައިލައްވާފައި ވަނީ ލިޔުންތެރިންގެ އޮއްޓަރު ހަރުވާނީ މައުލޫމާތުގެ ހަޒާނާ މުއްސަނދިވެގެން ކަމަށް ވިދާޅުވެ، ލިޔުންތެރިންގެ ދުވަހުގެ ތަހުނިޔާއާއި، ހެޔޮއެދުންތައް އެންމެހައި ދިވެހި ލިޔުންތެރިންނަށް އަރިސް ކުރަމުންނެވެ.
ލިޔުންތެރިން ދުވަހަކީ ކޮންމެ އަހަރެއްގެ ޖުލައި މަހުގެ އަށްވަނަ ދުވަހެވެ. މި ދުވަސް ފާހަގަކުރަނީ ރާއްޖޭގައި ނޫސް މަޖައްލާއެއް އުފައްދާ "އަލްއިސްލާހް"ގެ ނަމުގައި އެންމެ ފުރަތަމަ އަދަދު ނެރުނީ 1933 ވަނަ އަހަރުގެ ޖުލައި މަހުގެ އަށް ވަނަ ދުވަހު ކަމަށް ވާތީއެވެ.
