ތިނަދޫ ސިޓީގެ ތަރައްގީއަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަށް ބޭނުންވާ ފުރިހަމަ އެއްބާރުލުން ދެއްވާނެ ކަމުގެ ޔަގީންކަން އެ ސިޓީގެ މޭޔަރު ސައުދު އަލީ ދެއްވައިފި އެވެ.
މޭޔަރު ސައުދު މިހެން ވިދާޅުވީ މިނިސްޓާ އޮފް ސިޓީސް، ލޯކަލް ގަވާމަންޓް އެންޑް ޕަބްލިކް ވާކްސް އާދަމް ޝަރީފު އުމަރާއެކު މިއަދު ބޭއްވެވި ބައްދަލުކުރެއްވުމުގަ އެވެ. މިނިސްޓްރީގައި ބޭއްވުނު މި ބައްދަލުވުމުގައި މިނިސްޓަރު ވަނީ ދާދިފަހުން ބޭއްވި ލޯކަލް ކައުންސިލް އިންތިހާބުގައި މޭޔަރުކަން ސައުދު ކާމިޔާބު ކުރެއްވުމާ ގުޅިގެން މަރުހަބާ ދަންނަވާފަ އެވެ.
މި ބައްދަލުވުމުގައި ވާހަކަ ދައްކަވަމުން ސައުދު ވިދާޅުވީ، އެންމެ ބޮޑު އަމާޒަކީ ތިނަދޫއަށް ބޭނުންވާ ތަރައްގީ ހޯދައިދިނުން ކަމަށެވެ. އަދި އެ ތަރައްގީ ހާސިލުކުރުމަށްޓަކައި ސިޓީ ކައުންސިލްގެ ފަރާތުން ސަރުކާރަށް ދޭންޖެހޭ އެއްބާރުލުން ފުރިހަމައަށް ލިބޭނެ ކަމަށް ވިދާޅުވި އެވެ. ސިޔާސީ ގޮތުން ތަފާތު ހިޔާލުތަކެއް ހުރި ނަމަވެސް، ރަށުގެ ކުރިއެރުމަށްޓަކައި ސަރުކާރުން ހިންގާ އެއްވެސް މަޝްރޫޢަކަށް ހުރަސްއެޅުމުގެ ނިޔަތެއް ނެތްކަން އޭނާ ސާފުކޮށްދެއްވި އެވެ.
މީގެއިތުރުން، ތިނަދޫއަށް ބޭނުންވާ ތަރައްގީ ގެނެސްދިނުމަށް ސަރުކާރަށް ބޭނުންވާ ހުރިހާ އެއްބާރުލުމެއް ދޭނެކަމުގެ ޔަގީންކަން މިނިސްޓަރު އާދަމް ޝަރީފަށާއި އަދި ރައީސުލްޖުމްހުރިއްޔާ ޑރ. މުހައްމަދު މުއިއްޒަށް އަރުވާނެކަމަށް ސައުދު ވިދާޅުވި އެވެ.
މީގެ އިތުރުން، މިހާރުވެސް ސަރުކާރުން ތިނަދޫގައި ގިނަ މަޝްރޫއުތަކެއް ކުރިއަށްގެންދަވާކަން ފާހަގަކުރައްވައި، އެފަދަ މަސައްކަތްތަކަށް އެއްބާރުލުން ދިނުމަކީ މުޅި ރަށުގެ މުސްތަގުބަލަށް ކޮންމެހެން މުހިންމު ކަމެއްގެ ގޮތުގައި މޭޔަރު ސިފަކުރެއްވި އެވެ.
މި ބައްދަލުކުރެއްވުމުގައި މިނިސްޓަރ އާދަމް ޝަރީފް ވަނީ ކައުންސިލުތަކުގެ މަސައްކަތްތަކަށް ބޭނުންވާ އެހީތެރިކަން ފޯރުކޮށްދިނުމުގައި ސަރުކާރުގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން ދެއްވާފަ އެވެ. އަދި ލާމަރުކަޒީ ނިޒާމު އިތުރަށް ހަރުދަނާކޮށް، ކައުންސިލްތަކާ ގުޅިގެން ކުރެވިދާނެ ކަންކަމާ ބެހޭގޮތުން ދެ ބޭފުޅުން ވަނީ ފުޅާ ދާއިރާއެއްގައި މަޝްވަރާކުރައްވާފަ އެވެ.
