ތިނަދޫ ސިޓީގެ ރައްޔިތުންނަށާއި އެ ސަރަހައްދުގައި ދަތުރުކުރާ އުޅަނދުފަހަރަށް ފަސޭހަކަމާއެކު ތެޔޮ ފޯރުކޮށްދިނުމަށްޓަކައި، ފިއުލް ސަޕްލައި މޯލްޑިވްސް (އެފްއެސްއެމް) އިން އެ ރަށުގައި ބައުޒަރުގެ ހިދުމަތް ރަސްމީކޮށް ފަށައިފި އެވެ.

މި ހިދުމަތް ފެށުމާއެކު، ތިނަދޫގެ ޖެޓީ ސަރަހައްދުންނާއި ކަނޑު އުޅަނދުފަހަރަށް ބޭނުންވާ ތެޔޮ ފޯރުކޮށްދިނުމުގެ މަސައްކަތް މިހާރު ވަނީ ވަރަށް ބޮޑަށް ހަރުދަނާވެފަ އެވެ. އެފްއެސްއެމްއިން ބުނި ގޮތުގައި މި ބައުޒަރުގެ ސަބަބުން ތިނަދޫގެ އިގްތިސާދީ މަސައްކަތްތަކަށާއި، މަސްވެރި އުޅަނދުފަހަރަށް ބޭނުންވާ ތެޔޮ ފޯރުކޮށްދިނުމުގައި ބޮޑު ލުޔެއް ލިބިގެންދާނެ އެވެ.

އެފްއެސްއެމްއަކީ ރާއްޖޭގެ އެކި ކަންކޮޅުތަކުގައި ތެޔޮ ފޯރުކޮށްދިނުމުގެ ހިދުމަތް ފުޅާކުރަމުން އަންނަ ކުންފުންޏެކެވެ. އެގޮތުން، ފަހަކަށް އައިސް ގިނަ ރަށްތަކެއްގައި އެ ކުންފުނީގެ ތެޔޮ ޝެޑުތައް ހުޅުވައި، ހިދުމަތް ދަނީ ފޯރުކޮށްދެމުންނެވެ.

މި ފަހުން އެފްއެސްއެމްއިން ވަނީ ހއ. އިހަވަންދޫ، ހދ. ހަނިމާދޫ، ރ. ދުވާފަރު، ބ. އޭދަފުށި، ށ. މިލަންދޫ، ފ. ނިލަންދޫ، ދ. ކުޑަހުވަދޫ، އަދި ދ. މީދޫގައި ޒަމާނީ ފެންވަރުގެ ތެޔޮ ޝެޑުތައް ގާއިމްކޮށް ހިދުމަތް ދޭން ފަށާފަ އެވެ.

މިސަރުކާރުން އަންނަނީ އަތޮޅުތަކުގެ ތަރައްގީއަށާއި، ރައްޔިތުންނަށް ބޭނުންވާ އަސާސީ ހިދުމަތްތައް ފަސޭހަކަމާއެކު ލިބޭނެ އިންތިޒާމުތައް ހަމަޖެއްސުމަށް ގިނަ މަސައްކަތްތަކެއް ކުރަމުންނެވެ.