ކޮންޓްރެކްޓާ ފައިނޭންސް އުސޫލުން އިމާރާތްކުރުމަށް ހަމަޖެހިފައިވާ 55 ކައުންސިލް އިދާރާގެ މަސައްކަތްތައް މިއަހަރުގެ ޖޫން މަހުގެ ނިޔަލަށް ނިންމާލެވޭނެ ކަމަށާއި، އަލަށް އިމާރާތް ކުރެވޭ ކައުންސިލުތައް ހުންނާނީ ޒަމާނީ ފެންވަރަށް އަޕްގްރޭޑް ކުރެވިފައި ކަމަށް ސިޓީސް މިނިސްޓަރު އާދަމް ޝަރީފު އުމަރު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މައުލޫމާތު ދެއްވަމުން މިނިސްޓަރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރަށްރަށުގެ ކައުންސިލްތަކަށް ވެވަޑައިގެންފައިވާ ވައުދުފުޅާ އެއްގޮތަށް، ރައްޔިތުންނަށް ދޭ ހިދުމަތްތައް ފުޅާކުރުމަށް ހިންގާ މަޝްރޫއުގެ ދަށުން މިހާރު 54 ރަށެއްގައި ކައުންސިލް އުމާރާތްކުރުމުގެ އަމަލީ މަސައްކަތް ކުރިއަށްދާ ކަމަށެވެ.
މަސައްކަތުގެ ކުރިއެރުމާ ގުޅޭގޮތުން މިނިސްޓަރު އިތުރަށް ވިދާޅުވީ، ބައެއް ރަށްރަށުގައި މިހާރު ވަނީ އިމާރާތްތައް ހިޔާކުރުމާ ހިސާބަށް މަސައްކަތް ގެންދެވިފައި ކަމަށެވެ. އަދި މަސައްކަތް ނުފެށި އޮތް ރަށުގެ މަސައްކަތް ފެށުމަށް ބޭނުންވާ އެންމެހާ ތައްޔާރީތައް މިހާރު ވެފައިވާ ކަމަށްވެސް އެ މަނިކުފާނު ފާހަގަކުރެއްވިއެވެ.
މި މަޝްރޫއަކީ 'ޓާންކީ' އުސޫލުން ކުރިއަށްގެންދާ މަޝްރޫއެއްކަން ފާހަގަކުރައްވަމުން މިނިސްޓަރު ވިދާޅުވީ، މި ތަންތަން ކައުންސިލްތަކާ ހަވާލުކުރާނީ 'ފުލީ-ފާނިޝްޑް' ތަންތަނުގެ ގޮތުގައި ކަމަށެވެ. އެގޮތުން އޮފީހަށް ބޭނުންވާ ހުރިހާ މޭޒާއި ގޮނޑި އަދި ކައުންޓަރުތައް ވެސް ހުންނާނީ ފުރިހަމަކުރެވިފައި ކަމަށް މިނިސްޓަރު ވިދާޅުވިއެވެ.
މިނިސްޓަރު އާދަމް ޝަރީފް ވިދާޅުވި ގޮތުގައި މި މަޝްރޫޢުގެ ސަބަބުން ރަށްރަށުގެ ކައުންސިލްތަކުން ރައްޔިތުންނަށް ދޭ ޚިދުމަތްތަކުގެ ފެންވަރު ރަނގަޅުވެ، މުވައްޒަފުންނަށް މަސައްކަތް ކުރުމަށް އެކަށީގެންވާ މާހައުލެއް ލިބިގެންދާނެއެވެ.
