ސަރުކާރުގެ ޕަބްލިކް ސެކްޓާ އިންވެސްޓްމެންޓް ޕްރޮގްރާމް (ޕީއެސްއައިޕީ) ގެ ދަށުން އިމާރާތްކުރަމުންދާ 6 ރަށެއްގެ ކައުންސިލް އިދާރާގެ މަސައްކަތް މުޅިން ނިމިފައިވާ ކަމަށް ސިޓީސް އެންޑް ލޯކަލް ގަވަމަންޓް މިނިސްޓަރު އާދަމް ޝަރީފު އުމަރު މިއަދު ވިދާޅުވެއްޖެއެވެ.

މިނިސްޓަރު މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

މިނިސްޓަރު ވިދާޅުވި ގޮތުގައި މަސައްކަތް ނިމިފައިވާ ކައުންސިލް އިދާރާތަކަކީ ތ. ކިބިނދޫ، ށ. ނޫމަރާ، ލ. ކަލައިދޫ، މ. ރަތްމަންދޫ، މ. ވޭވަށް އަދި އދ. ހަންޏާމީދޫ އެވެ. މީގެ އިތުރުން ފ. ބިލެތްދޫ، ހއ. ހޯރަފުށި، އދ. ދިއްދޫ، ގދ. ހޯޑެއްދޫ އަދި ހދ. ކުރިނބީ ހިމެނޭހެން ފަސް ރަށެއްގެ މަސައްކަތް މިހާރުވެސް ބާރަށް ކުރިއަށްދާކަން މިނިސްޓަރު ފާހަގަކުރެއްވިއެވެ.

ކައުންސިލް އިދާރާތައް އެޅުމުގެ މަސައްކަތް ސަރުކާރުން ކުރިއަށް ގެންދަނީ މައިގަނޑު ދެ މަޝްރޫއަކަށް ބަހާލައިގެންނެވެ. އެއީ ޗައިނާ ސަރުކާރުގެ ހިލޭ އެހީގެ ދަށުން އިމާރާތްކުރާ 50 ކައުންސިލް އިދާރާގެ މަޝްރޫއާއި، ކޮންޓްރެކްޓަރ ފައިނޭންސް އުސޫލުން ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ ހަވާލުކޮށްގެން ކުރިއަށްގެންދާ 55 ކައުންސިލް އިދާރާގެ މަޝްރޫއެވެ.

އާރުސީސީއާ ހަވާލުކޮށްގެން ކުރިއަށްގެންދާ 55 ރަށުގެ މަސައްކަތާ ގުޅޭގޮތުން މިނިސްޓަރު ވިދާޅުވީ، އަމާޒަކީ މިއަހަރުގެ ޖުލައި މަހުގެ ނިޔަލަށް އެ ހުރިހާ އިމާރާތެއްގެ މަސައްކަތް ނިންމާލުން ކަމަށެވެ. މި މަޝްރޫއަކީ 631 މިލިއަން ރުފިޔާގެ މަޝްރޫއެކެވެ.

"މައިގަނޑުގޮތެއްގައި ގިނަ ރަށްރަށުގެ މަސައްކަތް މިހާރު ހުރީ ހިޔާކުރުމާ ހަމައަށް ގޮސްފައި،" މިނިސްޓަރު ވިދާޅުވިއެވެ.

މީގެ އިތުރުން، ކ. ދިއްފުށި އަދި ނ. މިލަދޫ ކައުންސިލް އިމާރާތުގެ ނުނިމި ހުރި މަސައްކަތްތައް ނިންމުމަށްޓަކައި، މި މަސް ނިމުމުގެ ކުރިން އެމްޓީސީސީއާ އެ މަސައްކަތް ހަވާލުކުރެވޭނެ ކަމަށްވެސް މިނިސްޓަރު ވިދާޅުވިއެވެ. އާރުސީސީން އިމާރާތްކުރާ އޮފީސްތައް ނިމޭއިރު، ވަށާފާރާއި އޮފީހަށް ބޭނުންވާ ފަރުނީޗަރުވެސް ހުންނާނީ ފުރިހަމަކުރެވިފައެވެ.