ސަރުކާރުގެ ފަސް މިލިއަން ގަސް އިންދުމުގެ ޕްރޮގްރާމްގެ ދަށުން ރ. އަދި މ. އަތޮޅުގެ ރަށްރަށުގައި ގަސް އިންދުމުގެ ހަރަކާތެއް މިއަދު ފަށައިފި އެވެ.
ތިމާވެއްޓާ ބެހޭ މިނިސްޓްރީން ބުނީ ރައީސް ޑރ. މުހައްމަދު މުއިއްޒުގެ ވައުދުފުޅެއް ކަމުގައިވާ، ރާއްޖޭގައި ފަސް މިލިއަން ގަސް އިންދުމުގެ ޕްރޮގްރާމްގެ ދަށުން މ. އަތޮޅާއި ރ. އަތޮޅުގެ މީހުން ދިރިއުޅޭ ހުރިހާ ރަށެއްގައި ގަސް އިންދުމުގެ ހާއްސަ ހަރަކާތްތަކެއް ކުރިއަށް ގެންގޮސްފައިވާ ކަމަށެވެ.
އެ ހަރަކާތްތަކުގައި ރާއްޖެއިން މަދުވެފައިވާ ހައިވަކަރު ގަސް ވެސް އެ އަތޮޅުތަކުގެ ރަށްތަކަށް ހަދިޔާކުރެވުނު ކަމަށް މިނިސްޓްރީން ބުންޏެވެ.
އެ ދެ އަތޮޅުގެ ހުރިހާ ރަށެއްގައި އެ ހަރަކާތްތައް ކުރިއަށް ގެންދިޔައީ, ފަސް މިލިއަން ގަސް އިންދުމުގެ މަޝްރޫއުގެ ޓީމެއް އެ ރަށްރަށް ޒިޔާރަތްކޮށްގެން ކަމަށް މިނިސްޓްރީން ބުންޏެވެ.
މިނިސްޓްރީން ބުނީ އެ ދެ އަތޮޅުގެ ކޮންމެ ރަށަކަށް އާންމުކޮށް ރަށްރަށުގައި ހެދޭ 50 ގަހެއް ހަދިޔާކޮށްފައިވާ ކަމަށެވެ.
މި ޕްރޮގްރާމްގެ ތެރެއިން ހަދިޔާކުރެވުނު ހައިވަކަރު ގަސްތަކަކީ، ސްރީ ލަންކާ ސަރުކާރުން ފަސް މިލިއަން ގަސް އިންދުމުގެ ޕްރޮގްރާމަށް ހަދިޔާ ކުރި ގަސްގަހެވެ. އެ ގަސްގަހުގެ ފުރަތަމަ ޝިޕްމަންޓް ރާއްޖެއަށް ލިބުމާ އެކު، ރިސޯޓުތަކަށް އަދި މީހުން ދިރިއުޅޭ ކޮންމެ ރަށަކަށް ދެ ހައިވަކަރު ގަސް ހަދިޔާ ކުރުމުގެ މަސައްކަތް މިނިސްޓްެރީން ވަނީ ފަށައިފަ އެވެ.
މިހާތަނަށް ރ, ލ, އަދި މ. އަތޮޅުގެ ރަށްރަށުގެ އިތުރުން އެއާޕޯޓް ހުރި ރަށްރަށަށް ވެސް ހައިވަކަރު ގަސްތައް ވަނީ ހަދިޔާކޮށްފަ އެވެ.
މީހުން ދިރިއުޅޭ ކޮންމެ ރަށަކަށް ހައިވަކަރު ގަސް ހަދިޔާކުރުމުގެ މަސައްކަތްތައް މިނިސްޓްރީން އަންނަނީ ކުރަމުންނެވެ.
މިނިސްޓްރީން ބުނީ ހައިވަކަރު ގަސްތަކަކީ، ފަސް މިލިއަން ގަސް އިންދުމުގެ މަޝްރޫއު ރަމްޒުކޮށްދިނުމުގެ ގޮތުން ލޭންޑްމާކެއްގެ ގޮތުގައި އިންދުމަށް ހަމަޖެހިފައިވާ ގަސްގަހެވެ. އެ ޕްރޮގްރާމްގެ ދަށުން ރާއްޖޭގެ ގުދުރަތީ ވެށި ރައްކާތެރިކޮށް، ގަސްގަހާގެހި އިތުރުކުރުމަށް މަގުފަހިވާނެ ކަމަށް މިނިސްޓްރީން ބުންޏެވެ.
