ޣައްޒާ ދޫކޮށް އެ ބިމުން ފައިބާ މީހުން ގެންދާނެ އެހެން ޤައުމެއް ހޯދުމާއި ގުޅޭ ގޮތުން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެމެރިކާގެ ރައީސް ޑޮނަލްޑްޓްރަމްޕާއެކު މަޝްވަރާ ކޮށްފިއެވެ.

ބައިނަލްއަޤްވާމީ ކްރިމިނަލް ކޯޓުން ނަތަންޔާހޫ ހައްޔަރުކުރުމަށް އަމުރު ނެރެފައިވާ އިރުވެސް އޭގައި ކޮޅުފައިން ޖަހައި އެމެރިކާއިން ދަނީ އެޤައުމަށް ނަތަންޔާހޫ ގެންގޮސް ބޮޑެތި ޙަފްލާތައް ބާއްވައި މުޅި ދުނިޔެއަށް އެ މަންޒަރުތައް ދައްކައި ބައިނަލްއަޤްވާމީ ކޯޓުގެ ޙުރުމަތް ކަނޑަމުންނެވެ.. ނަތަންޔާހޫ މިހާރު ހުރީ އެމެރިކާގައެވެ. މިއީ ފާއިތުވި ހަމަސްތެރޭ ނަތަންޔާހޫ އެމެރިކާއަށް ދިޔަ 3 ވަނަ ފަހަރެވެ.

ޓްރަމްޕާއެކު އިއްޔެ އޮތް ބައްދަލުވުމަށްފަހު ނޫސްވެރިންނާއި ވާހަކަދައްކަމުން ނަތަންޔާހޫ ބުނީ އަވަށްޓެރި ހިސާބުތަކުން ޙައްޒާ ރައްޔިތުން ބަލައިގަންނާނެ ކަމަށް ޓްރަމްޕަށް ވަރަށް ބޮޑު ޔަޤީންކަމެއް އެބައޮތެވެ.

ފާހަގަކޮށްލަން ޖެހޭ ކަމަކީ، މިއަހަރުގެ ކުރީކޮޅު އެމެރިކާގެ ރައީސް ޓްރަމްޕް ވަނީ ޣައްޒާގެ 2މިލިއަން ރައްޔިތުން އެ ބިމުން މުޅީން ނެރެ ސާފުކޮށްލާނެ ކަމަށް ވިދާޅުވެފައެވެ. އެއަށްފަހު އެތަން އަލުން ތަރައްޤިކޮށް ރަނގަޅު ސިޓީއަކަށް ހަދައިދީ އެތަނުގައި އިސްރާއީލްގެ ރައްޔިތުންނަސް ދިރިއުޅެވޭނެ ގޮތް ހަދައިދޭނެ ކަމަށް ޓްރަމްޕް ވަނީ އިޢުލާން ކޮށްފައެވެ..

މަޖުބޫރުކޮށްގެން އެތަނެއްގެ އަހުލުވެރީން އެހެން ތަނަކަށް ބަދަލުކުރުމަކީ ޖެނީވާ މުއާހަދާއާއި ހިލާފު ކަމެކެވެ. ނަމަވެސް އެމެރިކާއާއި އިސްރާއީލުން އދ. ގެ މިފަދަ އެއްވެސް ކަމަކަށް ބޯ ނުލަނބައެވެ.