ދުނިޔޭގެ އެންމެ މުއްސަނދި މަހުޖަނު އީލޮންމަސްކް އޭނާގެ ސިޔާސީ ބައިވެރިޔާ އެމެރިކާގެ ރައީސް ޑޮނަލްޑްޓްރަމްޕާއި މައްސަލަ ޖެހި، އެންމެ ފަހުން "އެމެރިކާ ޕާޓީ" ގެ ނަމުގައި ސިޔާސީ ޕާޓީއެއް އުފައްދާނެކަން އިއުލާންކޮށްފިއެވެ.
އޭނާގެ އެކްސް ޕްލެޓްފޯމްގައި މީގެ ދެދުވަސް ކުރިން ކުރި ޕޯސްޓެއްގައި ޓެސްލާ އާއި ސްޕޭސްއެކްސްގެ ވެރިޔާ ސިޔާސީ ޕާޓީއެއް ހަދަން އިޢުލާންކުރިއިރު، 2024 ވަނަ އަހަރު ޓްރަމްޕްގެ ކެމްޕޭނަށް މަސްކު ވަނީ 200 މިލިއަން ޑޮލަރަށް ވުރެ ގިނަ ޑޮލަރު ޚަރަދުކޮށްފައެވެ.
އެ ދެމީހުން ސިޔާސީ ހަތުރުންނަށް ވެފައިވަނީ “އެމެރިކަން ޕްރޮސްޕެރިޓީ އެންޑް ސެކިއުރިޓީ އެކްޓް” ގެ ނަމުގައި ސޮއިކޮށް ތަސްދީޤްކުރި 2.5 ޓްރިލިއަން ޑޮލަރުގެ ބިލަކާއި ގުޅިގެންނެވެ. މި ބިލުގެ ސަބަބުން އިގްތިސާދީ ގޮތުން އެމެރިކާ ކުރިއަރައި، ދިފާއީ ގާބިލްކަން އިތުރުވާނެ ކަމަށް ޓްރަމްޕް ލަފާކުރެއެވެ. ނަމަވެސް މިކަމެއް މަސްކް ޤަބޫލެއް ނުކުރެއެވެ. އަދި މި ބިލް ތަސްދީޤު ކުރީ ވެސް މަސްކު އެކަމަށް ދެކޮޅު ހަދަމުން ދަނިކޮށެވެ.
Advertisement
2.5 ޓްރިލިއަން ޑޮލަރުގެ މި ހަރަދު ބޮޑު ބިލަކީ ނަފްރަތު އުފެދޭ ކަމެއް ކަމަށް ބުނެ، އެ ބިލަށް ތާއީދުކުރި ރިޕަބްލިކަން ޕާޓީގެ ގާނޫނު ހަދާ މަޖިލީހުގެ މެމްބަރުންނާއި ދެކޮޅަށް މަސައްކަތް ކުރާނެ ކަމަށް ވެސް މަސްކު ވަނީ އިންޒާރު ދީފައެވެ.
ޓްރަމްޕާއި މަސްކު އެންމެ ފަހުން ބައްދަލުކުރީ ޖޫން މަހުގެ 5 ވަނަ ދުވަހުގައެވެ.
