މުނިފޫހިފިލުވުމުގެ ގޮތުން މަސްވެރިކަންކުރާ ފަރާތްތައް ނުވަތަ ސްޕޯޓްސް ފިޝިންއަށް އަމާޒުކޮށްގެން ބާއްވާ ހާއްސަ ވޯކްޝޮޕެއް މިއަދު ފަށައިފި އެވެ.

އެ މަސައްކަތު ބައްދަލުވުން ފަށަފައި ވަނީ މިއަދު ހެނދުނު 9:00 ގައި ހެންވޭރު މީރުމާ ހޯލުގަ އެވެ.

ފިޝަރީޒް މިނިސްޓްރީން ބުނީ ދެ ސެޝަންއަކަށް ބަހާލައިގެން ކުރިއަށް ގެންދާ އެ މަސައްކަތު ބައްދަލުވުން މިއަދު ހަވީރު 5:00 އާ ހަމައަށް ކުރިއަށް ގެންދާނެ ކަމަށެވެ.

އެ މަސައްކަތު ބައްދަލުވުން ފައްޓަވައިދެއްވީ މިނިސްޓަރު އަހުމަދު ޝިޔާމެވެ.

އެ މަސައްކަތު ބައްދަލުވުމުގެ މަގުސަދަކީ މުނިފޫހިފިލުވުމުގެ ގޮތުން ކުރާ މަސްވެރިކަން ދެމެހެއްޓެނިވި ގޮތެއްގައި ކުރިއެރުވޭނެ ގޮތްތަކާ މެދު މަޝްވަރާކުރުން ކަމަށް މިނިސްޓްރީން ބުންޏެވެ.

މިނިސްޓްރީން ބުނީ ފުރަތަމަ ސެޝަންގައި ކުރިއަށް ގެންދާނީ ވޯކްޝޮޕްގެ މަގުސަދާއި މުނިފޫހިފިލުވުމުގެ މަސްވެރިކަމާ ބެހޭ ގޮތުން މިހާރު ގެންގުޅޭ ވިސްނުމާއި ޑޭޓާ ޑްރައިވަން މެނޭޖްމަންޓްގެ ބޭނުންތެރިކަމުގެ އޯވާވިއުއެއް ފޯރުކޮށްދިނުން ކަމަށެވެ.

ދެވަނަ ސެޝަންގައި ކުރިއަށް ގެންދާނީ ސްޓޭކްހޯލްޑަރުންގެ ކަންބޮޑުވުންތަކާއި މުނިފޫހިފިލުމުގެ ގޮތުން މަސްވެރިކަން ކުރާ ފަރާތްތަކަށް ހުރި ގޮންޖެހުންތަކާ ގުޅޭގޮތުން މަޝްވަރާކުރުމެވެ.