ސަރުކާރުގެ "5 މިލިއަން ގަސް އިންދުމުގެ ޕްރޮގްރާމް" ގެ ދަށުން ލ. އިސްދޫގައި އެގްރޯފޮރެސްޓްރީ ދަނޑެއް ގާއިމުކުރުމަށްޓަކައި، އިސްދޫ ކައުންސިލާއި މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއާ ދެމެދު އިގްރާރެއްގައި ސޮއިކޮށްފިއެވެ.
އޮކްޓޯބަރު 17 ވަނަ ދުވަހު ސޮއިކުރެވުނު މި އިގްރާރަކީ، ރާއްޖޭގައި ކާބޯތަކެތީގެ ރައްކާތެރިކަން ކަށަވަރުކުރުމަށާއި ދަނޑުވެރިކަމުގެ އުފެއްދުންތެރިކަން އިތުރުކުރުމަށްޓަކައި ރާއްޖޭގެ 10 ރަށެއްގައި އެގްރޯފޮރެސްޓްރީ ދަނޑުތައް ގާއިމުކުރުމަށް ކުރިއަށްގެންދާ ބޮޑު މަޝްރޫއުގެ ތެރެއިން ސޮއިކުރެވުނު އެއްބަސްވުމެކެވެ. މި މަޝްރޫއަކީ ފިޝަރީޒް މިނިސްޓްރީއާއި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ގުޅިގެން ކުރިއަށްގެންދާ އިނިޝިއޭޓިވްއެކެވެ.
މި މަޝްރޫއުގެ ދަށުން ގާއިމުކުރެވޭ ދަނޑުތަކުގައި މައިގަނޑު ގޮތެއްގައި ހައްދާނީ ރާއްޖޭގެ ތިމާވެށްޓާ ގުޅޭ ދިގު މުއްދަތުގެ ގަސްގަހާގެއްސާއި، ކުރު މުއްދަތެއްގެ ތެރޭގައި ކާބޯތަކެތި ފޯރުކޮށްދޭނެ ބާވަތްތަކެވެ. މީގެއިތުރުން، މި ދަނޑުތައް ވެގެންދާނީ ދެމެހެއްޓެނިވި ދަނޑުވެރިކަމުގެ އާދަކާދަތައް ދައްކުވައިދޭ ނަމޫނާ ދަނޑުތަކަކަށެވެ. އަދި މިކަމަށް ބޭނުންވާ ޓެކްނިކަލް އިރުޝާދާއި އެހީތެރިކަން ފިޝަރީޒް މިނިސްޓްރީގެ ފަރާތުން ފޯރުކޮށްދިނުމަށް ވަނީ ހަމަޖެހިފައެވެ.
Advertisement
މި މަޝްރޫއަކީ 5 އަހަރު ދުވަހުގެ ތެރޭގައި 5 މިލިއަން ގަސް އިންދުމަށް ސަރުކާރުން ވެފައިވާ ވައުދުގެ ދަށުން، ތިމާވެށި ހިމާޔަތްކުރުމާއި އަމިއްލަ ރަށްރަށުގައި ކާބޯތަކެތި އުފެއްދުމުގެ މަސައްކަތް ގުޅުވާލައިގެން ހިންގޭ މުހިންމު ޕްރޮގްރާމެކެވެ.
