މިއަހަރުގެ ދުނިޔޭގެ ކަނޑުތަކުގެ ދުވަސް ފާހަގަކުރުމުގެ ގޮތުން ފިޝަރީޒް މިނިސްޓްރީން އިންތިޒާމުކޮށްގެން މުޅި ރާއްޖެއަށް ހުޅުވާލައިގެން ބާއްވާ "މަސްރޭސް 2026" ގައި ބައިވެރިވުމުގެ ފުރުސަތު މާދަމާގެ ނިޔަލަށް ހަމަވާނެއެވެ.

މި މަހުގެ 14 ވަނަ ދުވަހު އިއުލާނުކުރި މި މުބާރާތަކީ ފަރުމަސްވެރިކަމަށް ހިތްވަރުދީ، ކަނޑުތަކުގެ ދުވަސް ކުލަގަދަކޮށް ފާހަގަކުރުމަށް ބާއްވާ ހަރަކާތެކެވެ. މި މުބާރާތް ބޭއްވުމަށް ހަމަޖެހިފައިވަނީ އަންނަ ހުކުރު ދުވަސް ކަމަށްވާ 19 ޖޫން 2026 ގައެވެ.

މި މުބާރާތުގެ ވަނަވަނައަށް ހޮވޭ ފަރާތްތަކަށް ބޮޑެތި ފައިސާގެ އިނާމުތަކެއް ވަނީ ހުށަހަޅާފައެވެ. އެގޮތުން:

އެއްވަނަ ޓީމަށް: 30,000 ރުފިޔާ

ދެވަނަ ޓީމަށް: 25,000 ރުފިޔާ

ތިންވަނަ ޓީމަށް: 20,000 ރުފިޔާ

އެންމެ ބޮޑު މަސް ބާނާ ފަރާތަކަށް: 5,000 ރުފިޔާ

މާލެ ސިޓީން މި މުބާރާތުގައި ބައިވެރިވުމުގެ ފުރުސަތު ދިނުމަށް ހަމަޖެހިފައިވަނީ ފޯމު ހުށަހަޅާ ފަރާތްތަކުގެ ތެރެއިން ޝަރުތު ހަމަވާ ފުރަތަމަ 20 ޓީމަށެވެ. މާލެއިން ބައިވެރިވާން ބޭނުންވާ ޓީމުތަކުން މިނިސްޓްރީން ދީފައިވާ ގޫގްލް ފޯމު (https://tinyurl.com/4xe7p9jv) މެދުވެރިކޮށް މާދަމާ، 17 ޖޫން 2026 ގެ މެންދުރުފަހު 14:00 ގެ ކުރިން ރަޖިސްޓްރީވާން ޖެހޭނެއެވެ.

އަތޮޅުތަކުގެ ރަށްރަށުން މި މުބާރާތުގައި ބައިވެރިވާން ބޭނުންވާ ޓީމުތަކުން ފޯމު ހުށަހަޅަންޖެހޭނީ އެ ރަށެއްގެ ރަށު ކައުންސިލް އިދާރާއަށެވެ.

މި މުބާރާތާ ގުޅޭ އިތުރު މަޢުލޫމާތު ސާފުކުރެއްވުމަށް ބޭނުންފުޅުވާ ފަރާތްތަކުން 3339225 ނުވަތަ 3339272 ނަންބަރު ފޯނާ ގުޅުއްވުމަށް މިނިސްޓްރީން އިރުޝާދު ދެއްވައެވެ. މުބާރާތުގެ އާންމު ގަވާއިދު މިނިސްޓްރީގެ އިއުލާނާއެކު މިހާރު ވަނީ އާންމުކުރެވިފައެވެ.