އޭޝިއަން ޑިވެލޮޕްމަންޓް ބޭންކް (އޭޑީބީ)އިން ކުރިއަށް ގެންދާ ހެލްތު ފޯރަމެއްގައި ބައިވެރިވުމަށް ޞިއްޙީ ވުޒާރާގެ އިސް އޮފިޝަލުންތަކެއް ޕިލިޕިންސް އަށް ވަޑައިގެންފިއެވެ.

އޭޝިއާ އަދި ޕެސިފިކްގައި ޕްރޮސްޕަރަސް އެންޑް ރެސިލިއެންޓް (އިންސްޕަޔަރ) ހެލްތު ސިސްޓަމްސް ނުވަތަ އިންސްޕަޔަރގެ ނަމުގައި ބާއްވާ މި ފޯރަމް އޮންނާނީ މިމަހުގެ 7 އިން 11 އަށް ފިލިޕީންސްގެ ވެރިރަށް މެނީލާގައެވެ.

ޞިއްހީ ވުޒާރާއިން ބުނީ މި ފޯރަމްގައި އަލިއަޅުވާލުމަށް ހަމަޖެހިފައިވަނީ ޞިއްޙީ ނިޒާމް ހަރުދަނާކޮށް ތަރައްގީކޮށް ކުރިއެރުވުމަށް ކުރެވިދާނެ ކަންތައްތަކުގެ މައްޗަށް ކަމަށެވެ. އެގޮތުން ހެލްތު ފައިނޭންސިންގ އާއި، އިންފްރާސްޓްރަކްޗަރއާއި، އިންސާނީ ވަސީލަތްތައް އިތުރުކުރުމާއި ޕެންޑެމިކް އަށް ތައްޔާރުވުމާއި، މޫސުމަށް އަންނަ ބަދަލުތަކާއިއެކު ޞިއްޙީގޮތުން އަޅާނެ ފިޔަވަޅުތަކާއި، ޞިއްޙަތުގައި ޖެންޑަރ އިކުއަލިޓީ ކަށަވަރުކުރުމާއި، ނޮން ކޮމިއުނިކޭބަލް ޑިޒީޒް (އެންސީޑީ) މެނޭޖްކުރުމާއި، ނަފްސާނީ ޞިއްޙަތާއި އަދި ނިއުޓްރިޝަންގެ ކަންބޮޑުވުންތަކާއި، ޑިޖިޓަލް ހެލްތު ފަދަ ޞިއްޙީ ނިޒާމާއި ގުޅުންހުރި ކަންކަމުގެ މައްޗަށް މި ފޯރަމްގައި މަޝްވަރާކުރާނެ ކަމަށް ވުޒާރާއިން ބުންޏެވެ.

މި ފޯރަމްގައި މި މައްސަލަތަކުގެ މައްޗަށް ޞިއްޙީ ނިޒާމުތައް ހަރުދަނާކުރުމުގައި ވޯކިންގ ގްރޫޕްތަކުން އަމަލުކުރާ ގޮތާއި ހައްލުތައް ހުށަހެޅިގެންދާނެ ކަމަށް ވެސް ވުޒާރާއިން ބުންޏެވެ.

މި ފޯރަމްގައި ޞިއްޙީ ވުޒާރާގެ އިތުރުން ސަރުކާރުގެ އެހެނިހެން ކަމާގުޅުންހުރި އިދާރާތަކާއި، ޞިއްޙީ މާހިރުންނާއި، ހެލްތު ދިރާސާކުރާ ފަރާތްތަކާއި، ޑިވެލޮޕްމަންޓް ޕްރެކްޓިޝަނަރުންނާއި، އަމިއްލަ ޞިއްޙީ ޚިދުމަތްދޭ ފަރާތްތައް ވެސް ބައިވެރިވެއެވެ.

ޞިއްޙީ ވުޒާރާގެ ފަރާތުން މި ފޯރަމްގައި އިސްކޮން ހުންނެވީ ސްޓޭޓް މިނިސްޓަރ އާމިނަތު ޝިރުނާއެވެ.