އަންހެނުން އިގްތިސާދީ އަދި މާލީ ގޮތުން ބާރުވެރިކުރުވުމަށް ސިއްހަތާއި، އާއިލާއާއި އިޖްތިމާއީ އެހީއާ ބެހޭ ވުޒާރާއިން ކުރިއަށްގެންދާ ހާއްސަ ސިލްސިލާ މަޝްވަރާ ބައްދަލުވުންތަކެއް ށ. އަތޮޅުގައި ބޭއްވުމަށް ތާވަލުކޮށްފިއެވެ.
ސެޕްޓެމްބަރު 19 އިން 24 އަށް ކުރިއަށްދާ މި ބައްދަލުވުންތައް އެ އަތޮޅުގެ 10 ރަށެއްގައި ބޭއްވުމަށް ވަނީ ހަމަޖެހިފައެވެ.
މި ޕްރޮގްރާމުގެ މައިގަނޑު ބޭނުމަކީ ރަށްރަށުގެ ކުދި އަދި މެދު ފަންތީގެ ވިޔަފާރިކުރާ އަންހެނުންނާއި އަލަށް ވިޔަފާރިއަށް ނުކުންނަ ފަރާތްތަކަށް ހުރި ގޮންޖެހުންތަކާއި ފުރުސަތުތައް ދެނެގަތުމެވެ. އަދި އެފަރާތްތަކަށް ބޭނުންވާ ތަމްރީނުތަކާއި ވަސީލަތްތައް ހޯދައިދީ، އަންހެނުންގެ އިގްތިސާދީ ބައިވެރިވުން އިތުރުކުރުމަށް އެކުލަވާލާފައިވާ ސިޔާސަތުތައް ތަންފީޒުކުރުން ހަރުދަނާކުރުމެވެ.
Advertisement
މި މަޝްވަރާތަކުގެ ނަތީޖާއެއްގެ ގޮތުން އަންހެން ވިޔަފާރިވެރިންގެ ފުރިހަމަ މެޕިންގއެއް އެކުލަވާލެވި، ކުރިއަށް އޮތް ތަނުގައި އެފަރާތްތަކަށް ބޭނުންވާ އެހީތެރިކަން ފޯރުކޮށްދިނުމަށް މަގުފަހިވެގެންދާނެއެވެ.
ށ. އަތޮޅަކީ މި މަޝްރޫއު ކުރިއަށްދާ 5 ވަނަ އަތޮޅެވެ. މީގެ ކުރިން ލ. އަތޮޅު، ފުވައްމުލައް ސިޓީ، އައްޑޫ ސިޓީ އަދި އދ. އަތޮޅުގައި މި ބައްދަލުވުންތައް ވަނީ ބޭއްވިފައެވެ. އަންހެނުން އިގްތިސާދީ ގޮތުން ބާރުވެރިކުރުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާއްސަ އިސްކަމެއް ދެއްވާ ކަމަކަށްވާއިރު، މިއީ ޖެންޑަރ އީކުއަލިޓީ އެކްޝަން ޕްލޭންގައިވެސް ހިމެނޭ މުހިންމު އަމާޒެކެވެ.
މި ބައްދަލުވުންތަކުގައި ބައިވެރިވާން އެދޭ ފަރާތްތަކަށް ހާއްސަ އޮންލައިން ފޯމެއް މެދުވެރިކޮށް ރެޖިސްޓަރީވުމުގެ ފުރުސަތު މިހާރު ވަނީ ހުޅުވާލާފައެވެ.
