ތެލެސީމިއާ ބަލި ތަޙައްމަލުކުރަމުންދާ ކުދިންނަށް ދައުލަތުން ދެމުން އަންނަ މާލީ ޢިނާޔަތް (އެލަވަންސް) މަހަކު 2،000 ރުފިޔާއަށް ބޮޑުކޮށްފައިވާ ކަމަށާއި، މިހާރު 500 އަށް ވުރެ ގިނަ ކުދިންނަށް މި އެލަވަންސް ލިބެމުންދާ ކަމަށް ސިއްހަތާއި، އާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ. ވަޒީރު މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.
ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ޤީލާ ޢަލީ ވިދާޅުވީ، ތެލެސީމިއާ ތަޙައްމަލުކުރާ ފަރާތްތަކަށް ޚާއްޞަ އެލަވަންސެއް ހަމަޖައްސައިދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ރިޔާސީ ވަޢުދުފުޅެއް ކަމަށެވެ. އެގޮތުން، މި އަހަރުގެ ޖަނަވަރީ 1 ވަނަ ދުވަހުން ފެށިގެން މި ބަލި ތަޙައްމަލުކުރާ ކޮންމެ ފަރާތަކަށް މާލީ ޢިނާޔަތުގެ ގޮތުގައި މަހަކު 1،000 ރުފިޔާ ދޭން ފެށުނު ނަމަވެސް، ރައީސުލްޖުމްހޫރިއްޔާގެ ޚާއްޞަ ނިންމެވުމުގެ ދަށުން އެ ޢަދަދު މިހާރު ވަނީ 2،000 ރުފިޔާއަށް ބޮޑުކޮށްދެއްވާފައެވެ. އަދި މި ބަދަލާއެކު ރާއްޖޭގައި ތިބި 500 އަށް ވުރެ ގިނަ ތެލެސީމިއާ ކުދިންނަށް މި އެލަވަންސް ޤަވާޢިދުން ލިބެމުންދާކަން ވަޒީރު ވަނީ ފާހަގަކުރައްވާފައެވެ.
ތެލެސީމިއާ ކުދިންނާއި އެ ކުދިންގެ ޢާއިލާތަކުގެ ޙާލަތު ރަނގަޅުކޮށް، އެކުދިންނަށް އުފާވެރި ދިރިއުޅުމެއް ހޯދައިދިނުމަށް މި ސަރުކާރުން އަންނަނީ ވަރަށް ބޮޑު އިސްކަމެއް ދީގެން ފުޅާ ދާއިރާއެއްގައި މަސައްކަތް ކުރަމުންނެވެ. އެގޮތުން، މި ބައްޔަށް ދާއިމީ ފަރުވާއެއް ހޯދައިދިނުމުގެ ގޮތުން ޒަކާތު ފަންޑުގެ އެހީގައި މިހާތަނަށް 28 ކުއްޖަކު ވަނީ ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައެވެ.
Advertisement
މީގެއިތުރުން، އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ވެފައިވާ އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކަށް ބޯންމެރޯ ހެދުމަށްޓަކައި، ކޮންމެ ކުއްޖަކަށް އެއް މިލިއަން ރުފިޔާއަށް ވުރެ އިތުރުނުވާނެހެން އަހަރަކު ޖުމްލަ 10 މިލިއަން ރުފިޔާ ސަރުކާރުން އަންނަނީ ޚަރަދުކުރަމުންނެވެ.
ވަޒީރު ޤީލާ އިތުރަށް ވިދާޅުވީ، މާލީ އެހީތެރިކަމާއި ބޯންމެރޯ ހެދުމުގެ ޚިދުމަތް ފަދަ މުހިންމު ކަންކަން ފަހިކޮށްދީގެން ތެލެސީމިއާ ކުދިންނަށާއި އެ އާއިލާތަކަށް ދިމާވާ ދަތިތަކަށް ލުއި ހޯދައިދިނުމަކީ ސަރުކާރުން އެންމެ އިސްކަންދޭ އެއް ދާއިރާ ކަމަށެވެ.
