ބޯންމެރޯ ޓްރާންސްޕްލާންޓް ހެދުމަށް މާލީގޮތުން ތަނަވަސްކަން ނެތް ތެލެސީމިއާ ހަ ކުއްޖަކު، ޒަކާތު ފަންޑުގެ މާލީ އެހީތެރިކަމާއެކު މި ފަރުވާ ހޯދުމަށް އިންޑިއާއަށް ފުރުމަށް ހަމަޖެހިއްޖެއެވެ. މިއީ މިއަހަރުގެ ތެރޭގައި ސަރުކާރުގެ އެހީގައި ރާއްޖޭން ބޭރުން ބޯންމެރޯ ޓްރާންސްޕްލާންޓް ހެދުމަށް ފުރާ ފުރަތަމަ ގްރޫޕެވެ.
މި ކުދިން ފުރުމުގެ މުނާސަބަތުގައި މިއަދު ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި މިނިސްޓަރ އޮފް ހެލްތު ގީލާ އަލީ އާއި، މޯލްޑިވްސް ޒަކާތު ހައުސްގެ ޑިރެކްޓަރ ޖެނެރަލް އައްޝައިހް އިމްތިޠާއު އައްބާހާއި، މާލެ ސިޓީ ގްރޫޕް އޮފް ހޮސްޕިޓަލްސް (އެމް.ސީ.ޖީ.އެޗް) ގެ ސީ.އީ.އޯ އިބްރާހީމް އަބަދުއްރައްޒާގު ހަލީމްގެ އިތުރުން ތެލަސީމިއާ ސެންޓަރުގެ އިސްވެރިންނާއި ކުދިންގެ އާއިލާތަކުން ބައިވެރިވިއެވެ.
މޯލްޑިވްސް ޒަކާތު ހައުސްއިން ބުނި ގޮތުގައި، މި ފަރުވާއަށް ޝަރުތު ހަމަވާ އިތުރު ހަތަރު ކުއްޖަކު، އިދާރީ ގޮތުން ފުރިހަމަކުރަންޖެހޭ ކަންކަން ނިމުމުން ފުރުމަށް ވަނީ ހަމަޖެހިފައެވެ. މި އެހީ ފޯރުކޮށްދެނީ 21 ފެބްރުއަރީ 2024 ގައި އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ވެވުނު ފަހުމުނާމާގެ ދަށުންނެވެ. މި މަސައްކަތުގެ ދަށުން، ޒަކާތު ފަންޑުން 2.5 މިލިއަން ރުފިޔާ މިދިޔަ މަހު ވަނީ އެންސްޕާއަށް ޖަމާކޮށްފައެވެ.
Advertisement
ތެލެސީމިއާ އަކީ މުޅި އުމުރަށް ލޭ އަޅަންޖެހޭ ބައްޔަކަށްވާއިރު، ބޯންމެރޯ ޓްރާންސްޕްލާންޓަކީ މި ބައްޔަށް އޮތް ހަމައެކަނި ދާއިމީ ފަރުވާއެވެ. މި ފަރުވާގެ ސަބަބުން ބަލިމީހާގެ ހަށިގަނޑުގައި ދުޅަހެޔޮ ލޭގެ ސެލްތައް އުފައްދައިދީ، ގަވާއިދުން ލޭ އެޅުން ހުއްޓާލުމަށް މަގުފަހިވެއެވެ.
ޒަކާތު ހައުސްގެ ތަފާސްހިސާބުތަކަށް ބަލާއިރު، 2024 ވަނަ އަހަރުން ފެށިގެން މި ފަރުވާ ހޯދައިދިނުމަށް ޒަކާތު ފަންޑުން 23 މިލިއަނަށްވުރެ ގިނަ ރުފިޔާ ވަނީ ހަރަދުކޮށްފައެވެ. އަދި 2026 ވަނަ އަހަރާ ހަމައަށް ފަރުވާ ހޯދުމަށް ޖުމުލަ 10 ކުއްޖަކަށް މިހާރު ވަނީ ހުއްދަ ލިބިފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ ތެލެސީމިއާ ކުދިންނަށް ދާއިމީ ފަރުވާ ހޯދައިދިނުމަށް ހާއްސަ އިސްކަމެއް ދެއްވަމުންނެވެ.
