ދަނޑުވެރިކަމާއި ދިރޭތަކެއްޗާއި ބެހޭ މިނިސްޓަރު ޑރ. މަރްޔަމް މާރިޔާ، ފުޑް އެންޑް އެގްރިކަލްޗާ އޯގަނައިޒޭޝަން (އެފްއޭއޯ)ގެ ޑިރެކްޓަރު ޖެނެރަލް ޗޫ ޑޮންގްޔޫއާ ބައްދަލުކުރައްވައިފި އެވެ.

މިނިސްޓްރީން ބުނީ އެ ބައްދަލުކުރެއްވުން ކުރިޔަށް ގެންދިޔައީ އެފްއޭއޯގެ 44 ވަނަ ޖަލްސާގެ ހަވާސާގައި މިދިޔަ ބުރާސްފަތި ދުވަހު ކަމަށެވެ.

އެ ބައްދަލުވުމުގައި ރާއްޖެ އާއި އެފްއޭއޯއާ އޮންނަ ގުޅުން އިތުރަށް ހަރުދަނާކޮށް, އެ ޖަމިއްޔާގެ ފަރާތުން ރާއްޖެއަށް އެހީތެރިކަން އިތުރު ކުރެވިދާނެ ދާއިރާތަކާ މެދު މަޝްވަރާކުރެއްވި ކަމަށާއި އޭގެ ތެރޭގައި ކާބޯތަކެތީގެ ރައްކާތެރިކަން އިތުރުކުރުމާއި މޫސުމަށް އަންނަ ބަދަލުތަކާ ކުރިމަތިލުމުގެ ގާބިލުކަން އިތުރުކުރުން އަދި ދަނޑުވެރިކަމުގެ ދާއިރާގައި އާ ގޮތްތައް ތައާރަފުކުރުމަށް އިސްކަންދެއްވި ކަމަށް މިނިސްޓްރީން ބުންޏެވެ.

އެ ބައްދަލުވުމުގައި މަޝްވަރާކުރެވުނު މައިގަނޑު ދާއިރާތަކުގެ ތެރޭގައި ހިމެނެނީ;

1. ދަނޑުވެރިކަމުގައި ޑިޖިޓަލް ހައްލުތަކާއި އައު ގޮތްތައް
2. މޫސުމަށް އަންނަ ބަދަލުތަކާ ކުރިމަތިލެވޭ ކާބޯތަކެތީގެ ނިޒާމުތައް
3. ކެއުން ބުއިމުގެ ރަނގަޅު އާދަތަކަށް އަމާޒުކުރެވިފައިވާ ޕްރޮގްރާމްތައް
4. ދެމެހެއްޓެނިވި ދަނޑުވެރިކަން
5. ޓެކްނިކަލް ޤާބިލުކަން އިތުރުކުރުން
6. ޕެސްޓް އަދި ޕެސްޓިސައިޑް މެނޭޖްމަންޓް
7. ދިގު މުއްދަތުގެ ކޮންސަލްޓަންސީ އެހީތެރިކަން
8. ރާއްޖޭގެ 10 އަހަރުގެ ދަނޑުވެރިކަމުގެ މާސްޓަ ޕްލޭނެއް އެކުލަވާލުން

އެ މަސައްކަތަކީ ރާއްޖެ އާއި އެފްއޭއޯއާ ދެމެދުގައި އޮންނަ ގުޅުން އިތުރަށް ބަދަހިކޮށް، ދެމެހެއްޓެނިވި އަދި އެންމެންނަށް ފައިދާވާނެ ގޮތަށް ދަނޑުވެރިކަމުގެ ދާއިރާ ތަރައްގީކުރުމަށް ކަނޑައަޅާފައިވާ ގައުމީ ލަަނޑުދަނޑިތައް ހާސިލުކުރުމަށް އެޅޭ މުހިންމު ފިޔަވަޅެއް ކަމަށް މިނިސްޓްރީން ބުންޏެވެ.