ފީފާ ކުލަބް ވޯލްޑް ކަޕުގެ ކުއާޓަރ ފައިނަލުގައި ޕީއެސްޖީ އަދި ބަޔާން ބައްދަލުކުރި މެޗު ފަސޭހަކަމާއިއެކު ޔޫރަޕުގެ ޗެމްޕިއަން ޕީއެސްޖީން ކާމިޔާބުކޮށްފިއެވެ.
އެމެރިކާގެ މާސިޑެސް ބެންޒް ސްޓޭޑިއަމްގައި ކުޅުނު މި މެޗު ޕީއެސްޖީން ކާމިޔާބުކުރީ 0-2 ގެ ނަތީޖާއިންނެވެ. ދެވަނަ ހާފުގައި މެޗުގެ ފޯރި ފެނިގެންދިޔައިރު ދެވަނަ ހާފުގެ ކުރީކޮޅުގައި ބެޔާންގެ ހުނަރުވެރި އެޓޭކިންގ މިޑްފީލްޑަރު ވަނީ އަނިޔާވެ ބާލާފައެވެ. 78 ވަނަ މިނެޓުގައި ޖޯ ނެވެސް ތަނަވަސްކޮށްދިން ފުރުސަތެއްގައި ޕީއެސްޖީގެ ފުރަތަމަ ގޯލު ކާމިޔާބުކުރީ ޑުއޯރ އެވެ. އޭގެ ހަތަރު މިނެޓު ފަހުން ޕީއެސްޖީގެ ޕަޗޯ ކުރި ނުރައްކާތެރި ފައުލަކާ ގުޅިގެން އޭނާ ވަނީ ރަތްކާޑު ދައްކާ ދަނޑުން ފޮނުވާލާފައެވެ. އަދި މެޗުގެ 2+90 ގައި އެޓީމުގެ ލޫކަސް ހެނާންޑެސް އަށް ވެސް ވަނީ ރަތްކާޑު ދައްކާ ދަނޑުން ފޮނުވާލާފައެވެ.
ދެ ކުޅުންތެރިން މަދުން ކުޅެމުންދިޔަ ޕީއެސްޖީ ވަނީ މެޗުގެ ފަހު މިނެޓުގައި އިތުރު ގޯލެއް ޖަހައި ބަޔާންއަށް، އެމީހުންނަކީ ޔޫރަޕްގެ ޗެމްޕިއަނުންކަން ހަނދުމަކޮށްދީފައެވެ. އަޝްރަފް ހަކީމީގެ އެހީތެރިކަމާއެކު މި ގޯލު ކާމިޔާބުކުރީ ހުނަރުވެރި ފޯވާޑް އޮސްމަން ޑެމެބެލޭ އެވެ.
ޕީއެސްޖީ މި މުބާރާތުގެ ސެމީއަށް ދަތުރުކޮށްފައިވާއިރު އެ ޓީމު ބައްދަލުކުރަންޖެހޭނީ މިރޭ 01:00 ގައި ބައްދަލުކުރާ، މެޑްރިޑް އަދި ޑޯޓުމަންޑު ކުޅޭ މެޗުން މޮޅުވާ ބަޔަކާއި ދެކޮޅަށެވެ.
