ފީފާ ކުލަބް ވޯލްޑް ކަޕުގައި ފުޓުބޯޅައިގެ ގަދަ ބާރެއް ކަމަށްވާ މެންޗެސްޓަރ ސިޓީ، 3-4 ގެ ނަތީޖާއަކުން ބަލިކޮށް ސައޫދީގެ އަލް-ހިލާލުން އެ ކުލަބުގެ ޖަނާޒާ ދާދި ދެންމެއަކު ބާއްވައިފިއެވެ.

އެމެރިކާގެ ޖީސަސް ވަލެންޒުއެލާ ސައެޒްގައި ކުޅުނު މި މެޗުގެ ފުރަތަމަ ގޯލު 9 ވަނަ މިނެޓުގައި ސިޓީ އަށް ކާމިޔާބުކޮށްދިނީ ބެނާޑޯ ސިލްވާ އެވެ. ދެވަނަ ހާފުގެ ކުރީކޮޅު އަލް-ހިލާލުން ލީޑު ނަގާފައިވަނީ 46 ވަނަ މިނެޓު އަދި 52 ވަނަ މިނެޓުގައި ގޯލުތައް ކާމިޔާބުކޮށްގެންނެވެ. މި ގޯލުތައް ކާމިޔާބުކުރީ މާކޮސް ލިއޮނާޑޯ އަދި މެލްކޮމް އެވެ. 55 ވަނަ މިނެޓުގައި ސިޓީގެ ތަޖުރިބާކާރު ފޯވާޑު އާލިންގ ހާލަންޑު ސިޓީއަށް ނަތީޖާ ހަމަހަމަކޮށްދީފައިވާއިރު ނަތީޖާ ނެރުމަށް އިތުރު ވަޤުތުގެ ދެ ހާފު ކުޅުނެވެ.

އިތުރު ވަޤުތުގެ ފުރަތަމަ ހާފު ފަށައިގެން 4 ވަނަ މިނެޓުގައި ކުލިބަލޭ ވަނީ ހިލާލަށް ގޯލެއް ކާމިޔާބުކޮށްދީ ސިޓީ ޕްރެޝަރަށް ވައްޓާލާފައެވެ. އަދި އޭގެ 10 މިނެޓު ފަހުން ފޮޑެން ވަނީ ގޯލެއް ކާމިޔާބުކޮށް ސިޓީ އަށް ދިރުން ގެނެސްދީފައިވަނިކޮށް މެޗުގެ 113 ވަނަ މިނެޓުގައި ހިލާލްގެ މާކޮސް ލިއޮނާޑޯ ވަނީ ގޯލުގެ ތެރެއަށް ބޯޅަ ފޮނުވާލާ، އެމީހުންނަކީ ވެސް ދުނިޔޭގެ ގަދަ ބާރުންނާއި ހަނގުރާމަ ކުރެވޭނެ ބައެއްކަން ދައްކާލާފައެވެ.

މިއަދަކީ އަލް-ހިލާލުގެ ތާރީހުގައި ލިޔެވިގެންދާނެ ކާމިޔާބީއެއް ލިބިފައިވާ ދުވަހެކެވެ. ސަބަބަކީ ކުއާޓަރ ފައިނަލަށް ދެވުމެއް ނޫނެވެ. ސަބަބަކީ މެންޗެސްޓަރ ސިޓީ ކަހަލަ ކުލަބެއް މިފަދަ ބޮޑު މުބާރާތެއްގައި ބަލިކުރެވުމެވެ. 2019 ވަނަ އަހަރު އަލް-ހިލާލުން މި މުބާރާތުގެ ކުއާޓަރ ފައިނަލުގައި ކުޅެފައިވާއިރު، 2021 ވަނަ އަހަރު އެ ޓީމު ވަނީ ސެމީ ފައިނަލާ ހަމަޔަށް ގޮސްފައެވެ. އަދި 2022 ވަނަ އަހަރުގެ މުބާރާތުގެ ފައިނަލުގައި އެ ޓީމު ބަލިވީ ރިއަލް މެޑްރިޑް އަތުންނެވެ.

ކުއާޓަރ ފައިނަލުގައި އެ ޓީމު ކުޅޭނީ އިންޓަރ މިލާން ބަލިކުރި ބްރެޒިލްގެ ފުލޫމިނޭސޭ އާއި ދެކޮޅަށެވެ. އެ މެޗު އޮންނާނީ ޖުލައި 4 ވަނަ ދުވަހުގެ ރޭ ދަންވަރު 00:00 ގައެވެ.