ޔުއެފާ ޗެމްޕިއަންސް ލީގުގައި ރޭ ޕޯޗުގަލްގެ އެސްޓާޑިއޯ ޑޯ ޑްރަގާއޯގައި ޕޯޓޯއާ ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް، މެންޗެސްޓާ ސިޓީން މުބާރާތުގެ ފެށުން ރަނގަޅުކޮށްފިއެވެ.
މި ސީޒަނުގެ ޕްރިމިއާ ލީގުގައި ކުޅުނު ތިން މެޗުން ވެސް މޮޅުވެފައިވާ ސިޓީން ކޯޗު އެންޒޯ މަރެސްކާގެ އިރުޝާދުގެ ދަށުން ދައްކަމުން އަންނަ މޮޅު ކުޅުން މި މެޗުގައި ވެސް ވަނީ ތަކުރާރުކޮށްފައެވެ. ސިޓީ މޮޅުކޮށްދިނުމުގައި އެންމެ އިސް ދައުރެއް އަދާކުރީ ވޭތުވެދިޔަ ހޮނިހިރު ދުވަހު ކޮވެންޓްރީ ސިޓީ ކޮޅަށް ވެސް ލަނޑު ޖެހި އިތުބާރު ފޯވާޑް އާލިން ހާލަންޑެވެ.
މެޗުގެ ފުރަތަމަ ހާފުގައި ސިޓީން މެޗު ކޮންޓްރޯލްކޮށް ގިނަ ހަމަލާތަކެއް އުފެއްދި ނަމަވެސް، ޕޯޓޯގެ ކީޕަރު ޑިއޯގޯ ކޮސްޓާ ވަނީ އެންޓޮއިން ސެމެންޔޯ އާއި ރަޔާން ޗަރްކީ އަދި ހާލަންޑް ފޮނުވާލި ނުރައްކާތެރި ހަމަލާތައް ދިފާއުކޮށްފައެވެ. ނަމަވެސް ދެވަނަ ހާފު ފެށިގެން ދެވަނަ މިނެޓުގައި (47 ވަނަ މިނެޓުގައި) އެންޒޯ ފެނާންޑޭޒް ނަގައިދިން ހުރަހަކުން ބޮލުން ގޯލުގެ ތެރެއަށް ބޯޅަ ވައްދާލައިގެން ހާލަންޑް ވަނީ ސިޓީއަށް ލީޑު ނަގައިދީފައެވެ.
Advertisement
މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ގޮތުގައި ދެއްކި ވަގުތުގެ ފުރަތަމަ މިނެޓުގައި (91 ވަނަ މިނެޓުގައި) ރަޔާން އައިތު-ނޫރީ ތަނަވަސްކޮށްދިން ފުރުސަތަކުން ހާލަންޑް ވަނީ މެޗުގެ ދެވަނަ ލަނޑު ޖަހައި ސިޓީއަށް ތިން ޕޮއިންޓް ކަށަވަރުކޮށްދީފައެވެ.
މި ދެ ލަނޑާއެކު ހާލަންޑް ޗެމްޕިއަންސް ލީގުގައި ކުޅުނު 59 މެޗުން ޖެހި ލަނޑުގެ އަދަދު ވަނީ 59 އަށް އަރައި، މުބާރާތުގެ ތާރީޚުގައި ހަތްވަނައަށް އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު ހޯދާފައެވެ. އަދި ސިޓީއަށް ބަދަލުވި ފަހުން އެ ޓީމަށް ކުޅެދިން 40 ޗެމްޕިއަންސް ލީގު މެޗުން 36 ލަނޑު ހަމަކޮށް، ސާޖިއޯ އަގުއޭރޯ ސިޓީއަށް ހަދައިދީފައިވާ ރެކޯޑާ ވެސް ހާލަންޑް ވަނީ އަރާ ހަމަކޮށްފައެވެ.
މި މެޗުގައި ސިޓީގެ ޒުވާން މިޑްފީލްޑަރު އައްޔޫބް ބޫއައްދީގެ ފަރާތުން ވެސް ފާހަގަކޮށްލެވޭ މޮޅު ކުޅުމެއް ފެނިގެންދިޔައިރު، ޕޯޓޯއަށް ސިޓީގެ ގޯލާ އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.
މި މޮޅާއެކު ސިޓީން ދެން އެންމެ އަވަހަށް ނުކުންނާނީ ޕްރިމިއާ ލީގުގައި ވާދަވެރި މެންޗެސްޓާ ޔުނައިޓެޑާ ދެކޮޅަށް ކުޅޭ މެންޗެސްޓާ ޑާބީ މެޗަށެވެ.
