އެމެރިކާގެ ބޮސްޓަން ސްޓޭޑިއަމްގައި ރޭ ކުޅުނު ވޯލްޑް ކަޕް ގްރޫޕް އައިގެ މެޗުގައި، އާލިން ހާލަންޑް ކާމިޔާބުކޮށްދިން ދެ ލަނޑާއެކު 4-1 ގެ ނަތީޖާއަކުން އިރާގު ބަލިކޮށް ނޯވޭއިން އެގައުމުގެ ފެށުން ރަނގަޅުކޮށްފިއެވެ.

މި މެޗުގެ 29 ވަނަ މިނެޓާއި 43 ވަނަ މިނެޓުގައި ހާލަންޑް ވަނީ ލަނޑު ޖަހާފައެވެ. މިއީ ވޯލްޑް ކަޕުގައި އޭނާ ކާމިޔާބުކުރި ފުރަތަމަ ލަނޑުތަކެވެ. ނޯވޭގެ އަނެއް ލަނޑު 76 ވަނަ މިނެޓުގައި ލިއޯ އޮސްޓިގާޑް ކާމިޔާބުކޮށްދިންއިރު، ފަހު ލަނޑަކީ މެޗުގެ އިތުރު ވަގުތުގެ ތެރޭގައި އިރާގުގެ ފޯވާޑް އައިމަން ހުސައިން އަތުން ބައިކޮޅަށް ވަން ލަނޑެކެވެ.

މެޗު ފެށުނީއްސުރެ ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔައިރު، މެޗުގެ ފުރަތަމަ ފުރުސަތު ލިބުނީ އިރާގަށެވެ. އެގޮތުން 5 ވަނަ މިނެޓުގައި އައިމަން ހުސައިން ބޮލުން ފޮނުވާލި ބޯޅަ ދިޔައީ ގޯލުގެ ހުރަސް ދަނޑިމަތިން ބޭރަށެވެ.

ނޯވޭއިން މެޗުގެ ކޮންޓްރޯލް ހޯދައި، 29 ވަނަ މިނެޓުގައި ޑޭވިޑް މޮލާ-ވުލްފް ނަގައިދިން ހުރަހަކުން ހާލަންޑް ވަނީ އެ ޓީމަށް ލީޑު ނަގައިދީފައެވެ. ނަމަވެސް 39 ވަނަ މިނެޓުގައި އައިމަން ހުސައިން ކާމިޔާބުކުރި ބޮލުގެ ރީތި ލަނޑާއެކު އިރާގުން ނަތީޖާ އެއްވަރުކުރިއެވެ.

އިރާގުގެ މި އުފާވެރިކަން ދެމިއޮތީ އެންމެ ހަތަރު މިނެޓަށެވެ. އިރާގުގެ ކުޅުންތެރިއަކަށް ހެދުނު ގޯހެއްގެ ފައިދާ ނަގައި، ހާލަންޑް ވަނީ މެޗުގެ 43 ވަނަ މިނެޓުގައި ނޯވޭއަށް ދެވަނަ ފަހަރަށް ލީޑު ހޯދައިދީފައެވެ.

މެޗުގެ ދެވަނަ ހާފުގައި އިރާގުން ނަތީޖާ އެއްވަރުކުރުމަށް މަސައްކަތް ކުރި ނަމަވެސް، މާޓިން އޮޑެގާޑް ނަގައިދިން ކޯނަރަކުން 76 ވަނަ މިނެޓުގައި އޮސްޓިގާޑް ވަނީ ނޯވޭގެ ތިންވަނަ ލަނޑު ޖަހައިދީފައެވެ. އަދި މެޗުގެ ނަތީޖާ 4-1 އަށް ބަދަލުވީ މެޗުގެ އެންމެ ފަހު މިނެޓުގައި ހާލަންޑް ތަނަވަސްކޮށްދިން ފުރުސަތެއްގައި އިރާގުގެ އައިމަން ހުސައިން އަތުން ބައިކޮޅަށް ވަން ލަނޑުންނެވެ.

މި ގްރޫޕުގައި ނޯވޭއަށް ދެން އޮތީ އަންނަ ހޯމަ ދުވަހު ސެނެގޯލްއާ ދެކޮޅަށް ކުޅޭ މެޗާއި، އަންނަ ހުކުރު ދުވަހު ފްރާންސާ ދެކޮޅަށް ކުޅޭ މެޗެވެ.