ފީފާ ކުލަބް ވޯލްޑް ކަޕުގެ އެންމެ ކާމިޔާބު ކުލަބް، ރިއަލް މެޑްރިޑް ހިތި ގޮތަކަށް ބަލިކުރުމަށްފަހު ޔޫރަޕުގެ ޗެމްޕިއަން ޕީއެސްޖީ މުބާރާތުގެ ފައިނަލަށް ދަތުރުކޮށްފިއެވެ.

އެމެރިކާގެ މެޓްލައިފް ސްޓޭޑިއަމްގައި ކުޅުނު މި މެޗު 0-4 އިން ޕީއެސްޖީ ކާމިޔާބުކޮށްފައިވާއިރު، ރިއަލް މެޑްރިޑުން ބޮޑެތި ގޯސްތަކެއް ހަދާފައިވާކަން ފާހަގަކޮށްލެވެއެވެ. ހާއްސަ ގޮތެއްގައި ފުރަތަމަ ހާފުގައި މެޑްރިޑުގެ ޑިފެންސް ލައިނުން ހެދި ގޯސްތަކެއްގެ ބޭނުން ހިފައި މެޗުގެ ކުރީކޮޅު ޕީއެސްޖީން ވަނީ ދެ ގޯލު ކާމިޔާބުކޮށްފައެވެ.

މެޗުގެ 6 ވަނަ މިނެޓުގައި ޑިފެންޑަރު އެސެންސިއޯ ހެދި ގޯހަކުން ޕީއެސްޖީގެ ފަބިއަން ރުއިޒް ފުރަތަމަ ގޯލު ކާމިޔާބުކުރިއިރު އޭގެ ތިން މިނެޓު ފަހުން ޑިފެންޑަރު ރުޑިގާ ހެދި ގޯހަކުން ޑެމްބެލޭ ވަނީ ޕީއެސްޖީގެ ދެވަނަ ގޯލު ކާމިޔާބުކޮށްފައެވެ. ތިން ވަނަ ގޯލު ޕީއެސްޖީން ކާމިޔާބުކޮށްފައިވަނީ 24 ވަނަ މިނެޓުގައި ފަބިއަން ރުއިޒް އެވެ. މި ގޯލުވެސް ކާމިޔާބުކުރީ ދާދި ފަހުން ރިއަލް މެޑްރިޑާ ހަވާލުވި އެ ޓީމުގެ ކުރީގެ ކުޅުންތެރިޔާ ޒަބި އެލޮންޒޯގެ ފީކަޅާ ޓެކްޓިކްސްގެ ސަބަބުން ކަން ފާހަގަކޮށްލެވެއެވެ. އަދި ހަތަރު ވަނަ ގޯލަކީ 88 ވަނަ މިނެޓުގައި ބާކޯލާގެ އެހީތެރިކަމާއެކު ގޮންޒާލޯ ރާމޮސް ކާމިޔާބުކުރި ލަނޑެކެވެ. ފުރަތަމަ ހާފުގައި އެ ޓީމުގެ ކޮޅަށް ތިން ގޯލު މީގެ ކުރިން ވަދެފައިވަނީ މީގެ ފަސް އަހަރު ކުރިން ޝަކްތަރ ޑޮނެސްޓިކާ ބައްދަލުކުރި މެޗެއްގައެވެ. އޭރު ކޯޗަކަށް ހުރީ ޒައިނެދިން ޒިދާނެވެ.

އެންމެ ގިނަ އަދަދަކަށް ފީފާ ކުލަބް ވޯލްޑް ކަޕް ކާމިޔާބުކުރި ރިއަލް މެޑްރިޑަށް މިއީ ލަދުވެތި ނަތީޖާއެކެވެ. މީގެ ކުރިން މި މުބާރާތުގައި މެޑްރިޑް ހަމައެކަނި ބަލިވެފައިވަނީ 2001 ވަނަ އަހަރުގެ ފައިނަލުގައި މެކްސިކޯގެ ނެކާސާއާ ކުޅެ ޕެނަލްޓީ ޖަހައިގެންނެވެ. އެހެންކަމުން މެޑްރިޑްގެ ކޯޗަށް ބޮޑެތި ފާޑުކިޔުންތައް ސަޕޯޓަރުންގެ ފަރާތުން އަމާޒުވާނެކަމަށް ބެލެވެއެވެ.

މިއީ ޕީއެސްޖީން މި މުބާރާތުގެ ފައިނަލަށް ދަތުރުކުރި ފުރަތަމަ ފަހަރެވެ. ފީފާ ކުލަބް ވޯލްޑް ކަޕުގެ ތަށި އެ ކުލަބުން ކާމިޔާބުކޮށްފިނަމަ މިއީ އެ ޓީމަށް މި ސީޒަނުގައި ލިބޭނެ ފަސް ވަނަ ތައްޓެވެ. އެހެންކަމުން މި ސީޒަން ވެގެންދާނީ އެ ކުލަބުގެ ތާރިހުގައި އެންމެ ކާމިޔާބު ސީޒަނަށެވެ.

މުބާރާތުގެ ފައިނަލް މެޗު ޕީއެސްޖީ ކުޅޭނީ ޗެލްސީއާ ދެކޮޅަށެވެ. މި މެޗު އޮންނާނީ އަންނަ އާދީއްތަ ދުވަހުގެ ރޭ 00:00 ގައެވެ.