މިދިޔަ އޭޕްރީލް މަހުގެ ތެރޭގައި ހ. މިޓާޒް ގޭގެ ފުރާޅުމައްޗަށް ވެއްޓުނު ހައްވާ ޔުމްނު ރަޝީދަށް އިންސާފު ހޯދައި ދިނުމަށް ގޮވާލައި ޒުވާނުންތަކެއް ކުރި މުޒާހަރާތަކުގައި އިސްކޮށް އުޅުނު އައިޝަތު ޝިމަން އަހުމަދާއި އަބްދުﷲ މަހްޒޫމް މާޖިދަށް ދައުލަތާ އެކު ނަސޭހަތުގެ އެއްބަސްވުމެއް ހެދުމުގެ ފުރުސަތު އަދިވެސް އެބައޮތް ކަމަށް ޕްރޮސެކިއުޓަ ޖެނެރަލް (ޕީޖީ) އޮފީހުން މިއަދު ވިދާޅުވެއްޖެއެވެ. އެ ދެމީހުންގެ މައްޗަށް ދައުވާ ކުރަން ނިންމައި ކްރިމިނަލް ކޯޓަށް މައްސަލަ ހުށަހަޅާފައިވަނީ، ނަސޭހަތުގެ އެއްބަސްވުން ހަދަން އެދުނު ހިނދު އެކަމަށް ދެކޮޅު ހަދާފައިވާތީ ކަމަށް ޕީޖީން ވަނީ ހާމަކޮށްފައެވެ.

ޕީޖީން ވިދާޅުވި ގޮތުގައި މަހްޒޫމްގެ މައްޗަށް ދައުވާކުރަން ނިންމި ސަބަބަކީ، މުޒާހަރާކުރަމުންދިޔަ ވަގުތު އެ ސަރަހައްދުގައި ތިބި ފުލުހުން އަޑުގަދަކުރާ ނެގި ވަގުތު، މަހްޒޫމް ފުލުހެއްގެ މޭ މަތީގައި ކަނާއަތުން އަޅައި ކޮށްޕާލާފައިވާތީއެވެ.

ޝިމަންގެ މައްޗަށް ދައުވާ ކުރީ، ގާނޫނުލް އުގޫބާތުގެ 532 ވަނަ މާއްދާގެ (ހ)ގެ ދަށުންނެވެ. ފުލުހުންގެ ދައުރަށް ހުރަސް އެޅުމުގެ ކުށުގެ ދައުވާގެ އަސާސީ އަދަބަކީ 4 މަހާއި 24 ދުވަހަށް ބަންދުކުރުމެވެ. މިގޮތުން، ޝިމަންގެ މައްޗަށް ދައުވާ ކުރި ސަބަބެއް ކަމަށް ޕީޖީއިން ވިދާޅުވީ މުޒާހަރާކުރަމުން ދިޔަ ވަގުތު އެ ސަރަހައްދުގައި ތިބި ފުލުހުން އަޑުގަދަކުރާ ނެގި ވަގުތު، ފުލުހުންގެ ސަފު ރޫޅާލުމަށް ފަހު ފުލުހުންގެ ތެރެއަށް ގަދަކަމުން ވަދެ ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްތުގައި ހުރަސްއަޅާފައިވާ ކަމަށެވެ.

ޕީޖީ އޮފީހުގެ ތަރުޖަމާނު އަދި ގާނޫނީ ވަކީލު އަހުމަދު ޝަފީއު ވިދާޅުވީ ދައުވާކޮށްފައިވާ މަހްޒޫމާއި ޝިމަންއަށް ވެސް ނަސޭހަތުގެ އެއްބަސްވުމެއް ހެދުމުގެ ފުރުސަތު ކުރިން ވެސް ދިން ކަމަށެވެ. ނަމަވެސް ދެ މީހުން އެ ހުށަހެޅުމަށް އިންކާރުކޮށްފައިވާ ކަމަށް ވިދާޅުވިއެވެ. ނަމަވެސް ޝަފީއު ވިދާޅުވީ އަދިވެސް ނަސޭހަތުގެ އެއްބަސްވުމެއް ހެދުމުގެ ފުރުސަތު އެ ދެ މީހުންނަށް އެބައޮތް ކަމަށެވެ.