ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ނުރައްކާތެރި ބޮމުގެ ހަމަލާއާ ގުޅޭ މައްސަލައިގެ ތަހުގީގު އަވަސްކުރުމަށް ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ފުލުހުންނަށް އަންގައިފިއެވެ.
ޕީޖީ އޮފީހުން ބުނިގޮތުގައި ރައީސް ނަޝީދަށް ދިން ހަމަލާއާ ގުޅިގެން އެކަމުގައި ފަންޑުކުރި ފަރާތްތަކާ ގުޅުންހުރި ތަހުގީގުތައް އަވަސްކޮށް، ވީ އެންމެ އަވަހަށް އެ އޮފީހަށް ހުށަހެޅުމަށް ފުލުހުންގެ އިދާރާއަށް ވަނީ އަންގާފައެވެ. މި މައްސަލަ އަވަސްކުރުމަށް ފުލުހުންނަށް އެންގީ މި މަހުގެ 8 ވަނަ ދުވަހު އެވެ.
މެއި 6، 2021 ގައި ދިން މި ހަމަލާއަކީ ރައީސް ނަޝީދު ދިރިއުޅުއްވާ ގެކޮޅުން ނިކުމެވަޑައިގެން ކާރުކޮޅަށް އަރާވަޑައިގަންނަވަން ވަޑައިގަންނަވަނިކޮށް، މަގުމަތީގައި ޕާކުކޮށްފައި ހުރި ސައިކަލެއްގައި ހަރުކޮށްފައިވާ ބޮމެއް ގޮއްވާލައިގެން ދިން ހަމަލާއެކެވެ. މި ހާދިސާގައި އެމަނިކުފާނުގެ ހަށިކޮޅަށް ރޭޒާ ފުއްތަކެއް އަރައި، ލިބިވަޑައިގެންނެވި ސީރިއަސް އަނިޔާތަކަށް ރާއްޖެއިން ބޭރުން ގިނަ ދުވަސްތަކެއް ވަންދެން ފަރުވާ ހޯއްދަވާފައިވެއެވެ.
މި މައްސަލައިގައި އަމަލީ ގޮތުން ބައިވެރިވި އަހުމަދު އަދުހަމް ރަޝީދުގެ މައްޗަށް ކުށް ސާބިތުވެ، އޭނާ 23 އަހަރަށް ޖަލަށްލުމަށް ކޯޓުން ވަނީ ހުކުމްކޮށްފައެވެ. މީގެ އިތުރުން، ޓެރަރިސްޓު ޖަމާއަތަކަށް ތާއީދުކުރުމުގެ ދައުވާ ސާބިތުވެ އަބްދުﷲ އަލީ މަނިކު ފަސް އަހަރަށް ޖަލަށްލުމަށް ހުކުމްކޮށްފައިވާއިރު، މި މައްސަލައިގައި ހިމެނޭ މުހައްމަދު ތަސްލީމްގެ މައްޗަށް ކުށް ސާބިތުނުވާ ކަމަށް ކޯޓުން ވަނީ ނިންމާފައެވެ.
ބޮމުގެ ހަމަލާއާ ގުޅިގެން އިތުރު ބައެއްގެ މައްޗަށް ވެސް ދައުވާކޮށްފައިވާއިރު، އެ މީހުންގެ ޝަރީއަތްތައް ކޯޓުގައި ކުރިއަށްދަނީ ވަކިވަކިންނެވެ. ޕީޖީން މިހާރު ބާރުއަޅަމުންދަނީ މި ހަމަލާއަށް ޚަރަދުކުރި މީހުން ހޯދުމުގެ ތަހުގީގު ނިންމައި ވީހާވެސް އަވަހަށް ދައުވާ އުފުލުމަށެވެ.
