ލ. އަތޮޅުގައި ބަނދަރަކާއެކު ބަންކަރިން ހިދުމަތް ދިނުމަށް ނިންމައި، އެ މަޝްރޫއަށް އިންވެސްޓްކުރަން ފުރުސަތު ހުޅުވާލައިފިއެވެ. މި ފުރުސަތު ހުޅުވާލާފައިވަނީ ރާއްޖޭގެ އިކޮނޮމިކް މިނިސްޓްރީން އިންތިޒާމުކޮށްގެން ސިންގަޕޫރުގައި މިހާރު ކުރިއަށްދާ އިންވެސްޓްމަންޓް ފޯރަމްގައެވެ.
މި ފޯރަމްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ގިނަ އަދަދެއްގެ ވަޒީރުންނާއި ބައެއް ކުންފުނިތަކުގެ ވެރިން ބައިވެރިވެވަޑައިގަންނަވައެވެ. އަދި ސިންގަޕޫރުގައި ހަރަކާތްތެރިވާ ވަރަށް ގިނަ އަދަދެއްގެ ވިޔަފާރިވެރިން ވެސް މި ފޯރަމްގައި ބައިވެރިވެއެވެ.
މި މަޝްރޫއުގެ ސަބަބުން އެ ސަރަހައްދުން ދަތުރުކުރާ ބޭރުގެ ބޯޓުފަހަރަށް ބަންކަރިން ހިދުމަތް ދިނުމުގެ ފުރުސަތު ފަހިވެގެންދާނެ ކަމަށް އިކޮނޮމިކް މިނިސްޓްރީން ވިދާޅުވެއެވެ. ރައީސް ޑރ. މުއިއްޒުގެ ސަރުކާރުން ވަނީ ރާއްޖޭގެ އެންމެ އުތުރުގައި ވެސް ބަންކަރިން ހިދުމަތް ފަށައިފައެވެ. މި ހިދުމަތާއެކުގައި އެ ސަރަހައްދުން ދަތުރުކުރާ ވަރަށް ގިނަ ބޯޓުފަހަރު ތެޔޮ އެޅުން ފަދަ މުހިންމު ހިދުމަތްތަކެއް ދަނީ ހޯދަމުންނެވެ.
ސަރުކާރުގެ ވިސްނުމަކީ ކުރިއަށް އޮތް ތަނުގައި އުތުރުގައި ދެމުން އަންނަ ހިދުމަތާއި ލ. އަތޮޅުގައި އަލަށް ފަށަން އުޅޭ ބަންކަރިން މަޝްރޫއު ތަރައްގީކޮށް، ދުނިޔޭގެ ފެންވަރުގެ ހިދުމަތްތަކެއް އެ ތަންތަނުން ދިނުމަށެވެ.
ލ. އަތޮޅުގައި ކުރިއަށް ގެންދަން ނިންމާފައިވާ ބަންކަރިން މަޝްރޫއުއާ ގުޅޭ މާ ބޮޑު ތަފްސީލެއް ސަރުކާރުން އަދި ނުދެއެވެ. އެ މަޝްރޫއު ކުރިއަށް ގެންދަން ނިންމާފައިވާ ރަށެއް ވެސް އިންވެސްޓްމަންޓް ފޯރަމްގައި ހާމަކޮށްފައެއް ނުވެއެވެ. އިކޮނޮމިކް މިނިސްޓްރީން ވިދާޅުވި ގޮތުގައި މި މަޝްރޫއުގައި ހިމެނޭ މައިގަނޑު ކަންކަމުގެ ތެރޭގައި ބަންކަރިން ހިދުމަތް ދިނުމާއި ބަނދަރާ ގުޅޭ އިންފްރާސްޓްރަކްޗާ ގާއިމުކުރުމާއި ސްޓޯރޭޖް ފެސިލިޓީ އަދި ސަޕޯޓް އިންފްރާސްޓްރަކްޗާ ގާއިމުކުރުން ހިމެނެއެވެ.
