ހދ. ހަނިމާދޫ އިންޓަނޭޝަނަލް އެއާޕޯޓުގެ އަމަލީ މަސައްކަތް އަންނަ ސެޕްޓެމްބަރު މަހަށް ނިންމާލެވޭނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުالله މުއްތަލިބް މިއަދު ވިދާޅުވެއްޖެ އެވެ.
މުއްތަލިބް އެކްސްގައި ކުރެއްވި ޕޯސްޓެއްގައި ވިދާޅުވީ އެ މަޝްރޫއުގެ 88.7 ޕަސެންޓް މަސައްކަތް މިހާރު ނިމިފައިވާ ކަމަށެވެ. އެ އެއާޕޯޓުގެ ރަންވޭގެ މަސައްކަތް އެއްކޮށް ނިމިފައިވާ ކަމަށް ވެސް އޭނާ ވިދާޅުވި އެވެ.
ހަނިމާދޫ އެއާޕޯޓަށް މިހާރު ފްލައިޓް ޖެއްސުމަށް ވެސް ބޭނުންކުރަނީ އާ ރަންވޭގެ ބައެކެވެ. އެއީ 2،460 މީޓަރުގެ ރަންވޭއެކެވެ. މި މަޝްރޫއު ނިމުމުން އެ އެއާޕޯޓުން އޭ320 އާއި ބޮއިންގް 737ގެ މަރުކާގެ ބޯޓުތަކަށް ވެސް ހިދުމަތް ދެވޭނެ އެވެ.
Advertisement
މުއްތަލިބް ވިދާޅުވި އެއާޕޯޓްގެ ޕެސެންޖާ ޓާމިނަލްގެ 83 ޕަސެންޓް މަސައްކަތް ނިމިފައިވާ ކަމަށެވެ. އަދި އެއާޕޯޓްގެ އާ އެއާ ޓެރެފިކް ކޮންޓްރޯލް ޓަވަރާއި ހެނގަރު އަދި ކާގޯ ބިލްޑިން މަސައްކަތުގެ 96 ޕަސެންޓް މަސައްކަތް ނިމިފައިވާ ކަމަށް ވެސް އޭނާ ވިދާޅުވި އެވެ.
އިންޑިއާގެ އެގްޒިމް ބޭންކުގެ ލޯނު އެހީގައި ހަދާ އެ އެއާޕޯޓުގެ ފިއުލް ޖެޓީ އާއި ފިއުލް ފާމާއި އިންޖީނުގެ އާއި ޓަމިނަލް ޖެޓީ އަދި އެއާޕޯޓަށް އަންނަ މީހުން މަޑުކޮށްލައިގެން ތިބުމަށް ޓާމިނަލް ފްރަންޓް އިމާރާތެއް ވެސް ހަދަމުން އަންނަނީ ހަދަމުންނެވެ.
އާ ޓާމިނަލްގެ އެންމެ ތިރީ ފަންގިފިލާ ބޭނުންކުރާނީ އެތެރޭގެ އުދުހުންތަކަށެވެ. އަދި މަތީ ފަންގިފިލާ ބޭނުންކުރާނީ އިންޓަނޭޝަނަލް ދަތުރުތަކަށެވެ. ކޮންމެ ފަންގިފިލާއެއްގައި ދެ ގޭޓު ހުންނާނެ އެވެ. އަދި އަތޮޅު ތެރޭ ރަށެއްގެ އެއާޕޯޓެއްގައި ބޭނުންކުރާ ފުރަތަމަ އެއިރޯ ބްރިޖު ވެސް ހުންނާނީ ހަނިމާދޫ އެއާޕޯޓްގަ އެވެ.
ހަނިމާދޫ އާ އެއާޕޯޓްގައި އެއްފަހަރާ 9 ބޯޓު ޕާކުކޮށްފައި ބޭއްވޭނެ އޭޕްރަންއެއް ވެސް ވަނީ ހަދައިފަ އެވެ.
ގާތްގަނޑަކަށް ދެ ބިލިޔަން ރުފިޔާގެ މި މަޝްރޫއު ނިމުމުން ހަނިމާދޫ އިންޓަނޭޝަނަލް އެއާޕޯޓުން އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެ ކަމަށް އެ އެއާޕޯޓް ހިންގާ ރީޖަނަލްސް އެއާޕޯޓްސް ކޮމެޕީން ބުންޏެވެ.
