މިދިޔަ ހޯމަ ދުވަހު އާންމުނަށް ހުޅުވާލައިގެން ޚުލާސާ އިން ފޭސްބުކްގައި ކުރިޔަށް ގެންދިޔަ ޕޯލް ބޮޑު ތަފާތަކުން ރައީސް ނަޝީދު ކާމިޔާބުކޮށްފި އެވެ.
މި ޕޯލަކީ އެމްޑީޕީގެ ރިިޔާސީ ޕްރައިމަރީއަށް ގިނަ އަދަދެއްގެ ކެންޑިޑޭޓުން ޝައުގުވެރިކަން ފާޅުކޮށްފައިވާތީ އެ ކެންޑިޑޭޓުންގެ ތެރެއިން ރައްޔިތުންގެ އެންމެ ބޮޑު ތާއީދެއް އޮތީ ކޮން ބޭފުޅަކަށްތޯ ބެލުމަށް ޚުލާސާ އިން އާންމުކޮށް ހުޅުވާލި ޕޯލެކެވެ. މި ޕޯލުގެ ސުންގަޑި މިއަދު ހަމަވެފައިވާއިރު 1300 އަށްވުރެ ގިނަ ބޭފުޅުން މި ޕޯލްގައި ބައިވެރިވެފައިވެއެވެ. މި ޕޯލްގައި ވޯޓު ލުމަށް ބޭނުންކޮށްފައިވަނީ ފޭސްބުކްގެ ރިއެކްޝަންސްތަކެވެ.
މި ޕޯލުގެ ނަތީޖާއަށް ބަލާއިރު ރައީސް ނަޝީދު، ޕޯލް ކާމިޔާބުކޮށްފައިވަނީ ޖުމްލަ 884 ވޯޓުންނެވެ. އެއީ ވޯޓުލީ މީހުންގެ 68 އިންސައްތައެވެ. ދެވަނަ ހޯއްދެވީ ރައީސް އިބްރާހީމް ސޯލިހެވެ. އެމަނިކުފާނަށް 237 މީހުން ވޯޓުލިއިރު އެއީ ޖުމްލަ ވޯޓުގެ 18 އިންސައްތައެވެ. ތިން ވަނައިގައި ފައްޔާޒު އިސްމާއީލް އޮތީ 7 ޕަސެންޓް ހޯއްދަވައިގެންނެވެ. އެއީ 94 ވޯޓެވެ. ޕޯލްގެ އެންމެ ފުލުގައި އޮތް ޑރ. އަޙްމަދު ޝަމްހީދަށް ލިބިވަޑައިގެންނެވީ 4 ޕަސެންޓެވެ. އެއީ 56 ވޯޓެވެ. އެއްވެސް ކެންޑިޑޭޓެއް އިހްތިޔާރު ކުރަން ބޭނުން ނުވާ މީހުން އެހެން ރިއެކްޝަންތައް ބޭނުންކޮށްފައިވާއިރު އެއީ ވޯޓުގެ 3 އިންސައްތައެވެ.
އެމްޑީޕީގެ ރިޔާސީ ޓިކެޓު ހޯދުމަށް އެ ޕާޓީގެ ގިނަ ލީޑަރުން ޝައުގުވެރިކަން ފާޅުކޮށްފައިވާއިރު ހިޔާލު ތަފާތުވެ އެ ޕާޓީ ތެރޭގައި ވަނީ ވަރަށް ބޮޑަށް ބައިބައިކަން އުފެދިފައެވެ. އެމްޑީޕީ ޗެއާޕަރސަން ފައްޔާޒުގެ ދައުވަތަކަށް ރައީސް ނަޝީދު އެ ޕާޓީއާ އަލުން ގުޅިވަޑައިގަތުމުން އިބްރާޙިިމް ސޯލިހުގެ ފެކްޝަނުން ދަނީ ވަރަށް ބޮޑެތި ފާޑުކިޔުންތައް ނަޝީދާއި ޑިމޮކްރެޓްސްގެ ބޭފުޅުންނަށް ވިދާޅުވަމުންނެވެ.
