ދައުލަތުގެ ބަޖެޓުން ކުރާ ހަރަދުން 21 ޕަސެންޓް ދަށްކޮށްފި އެވެ.
ފިނޭންސް މިނިސްޓްރީން އާންމުކުރި ވީކްލީ ފިސްކަލް ޑިވެލޮޕްމަންޓް ރިޕޯޓްގައިވާ ގޮތުގައި، މި މަހުގެ 19 ވަނަ ދުވަހުގެ ނިޔަލަށް ކޮށްފައިވާ ހަރަދުތައް، މިދިޔަ އަހަރުގެ އެ މުއްދަތާ އަޅައިބަލާއިރު 21 ޕަސެންޓް ދަށަށް ގޮސްފައިވެ އެވެ. އަދި ދައުލަތުގެ ބަޖެޓުގެ އޯވަރޯލް ބެލެންސް 1.4 ބިލިއަން ރުފިޔާގެ ސާޕްލަސްއަކަށް އަރާފައިވެ އެވެ.
މި މަހުގެ 19 ގެ ނިޔަލަށް ދައުލަތުގެ ބަޖެޓުން 16.2 ބިލިއަން ރުފިޔާ ހޭދަކޮށްފައިވާއިރު، އެއީ މިދިޔަ އަހަރުގެ އެ މުއްދަތުގެ ތެރޭގައި ދައުލަތުން ކޮށްފައިވާ ހަރަދާއި އަޅައިބަލާއިރު، 21 ޕަސެންޓް ދަށް އަދަދެކެވެ. ދައުލަތުގެ ރިކަރަންޓް ހަރަދު 3.4 ޕަސެންޓަށް ދަށްވެފައިވާއިރު، ކެޕިޓަލް ހަރަދު ވަނީ 70.1 ޕަސެންޓް ދަށްވެފަ އެވެ.
Advertisement
ރިކަރަންޓް ހަރަދުގެ 58.7 ޕަސެންޓް ދައުލަތުގެ އޮފީސްތަކުގެ އިދާރީ ހިންގުމާ ގުޅޭ ކަންކަމަށް ހޭދަކޮށްފައިވާއިރު، އެއީ މިދިޔަ އަހަރުގެ އެ މުއްދަތާ އަޅައިބަލާއިރު 8.6 ޕަސެންޓް ދަށް ޢަދަދެކެވެ.
އޮފީސް ހިންގުމުގެ ބޭނުމަށް ހޯދާ ތަކެތީގެ ހަރަދުން 70 ޕަސެންޓް ދަށްވެފައިވާއިރު، މަރާމާތުކުރުމާއި ބެލެހެއްޓުމުގެ ހަރަދުން ވަނީ 20.7 ޕަސެންޓް ދަށްވެފަ އެވެ. ދައުލަތުގެ ބަޖެޓުން ދަތުރުފަތުރުކުރުމަށް ކުރާ ހޭދަ ވެސް ވަނީ މިދިޔަ އަހަރާ އަޅައިބަލާއިރު، 15.3 ޕަސެންޓް ދަށްވެފަ އެވެ.
ދައުލަތުން ފޯރުކޮށްދޭ އެކި އެހީ އާއި ސަބްސިޑީތައް ފޯރުކޮށްދިނުމަށް ކުރެވުނު ހޭދަ، މިދިޔަ އަހަރާ އަޅައިބަލާއިރު 3.6 ޕަސެންޓް ދަށްކޮށްފައިވެ އެވެ.
އެ ހަރަދުތައް ދަށްކުރެވިފައި ވިޔަސް، އާސަންދައަށް ހިނގާ ހަރަދު 1.4 ޕަސެންޓް އިތުރުވެ، މެޑިކަލް ވެލްފެއާގެ ހަރަދުތައް 35.2 ޕަސެންޓް ދަށްވެފަ އެވެ.
ހިދުމަތް ދިނުމުގެ ބޭނުމަށް ހޯދާ ތަކެއްޗަށާއި ކައުންސިލްތަކަށް ގްރާންޓްގެ ގޮތުގައި ދޫކޮށްފައިވާ ފައިސާގެ އަދަދު މިދިޔަ އަހަރާ އަޅައިބަލާއިރު ވަނީ އިތުރުވެފަ އެވެ.
ދައުލަތުން ނަގާފައިވާ ދަރަންޏަށް ފައިސާ ދައްކާފައިވާ މިންވަރު މިދިޔަ އަހަރުގެ އެ މުއްދަތާއި އަޅާބަލާއިރު 169.5 ޕަސެންޓް އަދި ސޮވެރިން ޑިވެލޮޕްމަންޓް ފަންޑަށް ޖަމާކުރާ ފައިސާގެ އަދަދު 45.6 ޕަސެންޓް އިތުރުވެފަ އެވެ.
ދައުލަތުގެ ހަރަދުތައް ކުޑަކޮށް ބަޖެޓަށް ލުއިކުރުމަށް ސަރުކާރުން މުހިންމު ގިނަ ފިޔަވަޅުތަކެއް އަޅާފައިވެ އެވެ.
