މިއަހަރުގެ މިހާތަނަށް ދައުލަތުގެ އާމްދަނީ 1.8 އިންސައްތަ އިތުރުވެ، އިގުތިސާދީ ދާއިރާތަކުން ހެޔޮ ނަތީޖާތަކެއް ފެންނަމުންދާކަން މާލީ ވުޒާރާގެ ތަފާސްހިސާބުތަކުން ހާމަވެއްޖެއެވެ.
އޮކްޓޯބަރު 1 ގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 30.879 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު ރަނގަޅު ކުރިއެރުމެކެވެ. މި ކުރިއެރުމުގެ އެންމެ ބޮޑު ހިއްސާއެއްވަނީ ޓެކުހުގެ ގޮތުގައި ލިބުނު އާމްދަނީ 5.8 އިންސައްތަ އިތުރުވުމެވެ.
އާމްދަނީ އިތުރުވުމުގެ މައިގަނޑު ބާރަކަށް ވެފައިވަނީ ފަތުރުވެރިކަމުގެ ދާއިރާއެވެ. އެގޮތުން ޓީ.ޖީ.އެސް.ޓީ އިން 8.062 ބިލިއަން ރުފިޔާ ލިބިފައިވާއިރު، އެއާޕޯޓް ސާވިސް ޗާޖާއި ޑިޕާޗާ ޓެކުހުން ލިބުނު އާމްދަނީ ވަނީ 8.2 އިންސައްތަ އިތުރުވެ 1.529 ބިލިއަން ރުފިޔާއަށް އަރާފައެވެ. މީގެއިތުރުން ވިޔަފާރިއާއި މުދަލުން ނަގާ ޓެކުހާއި، އިމްޕޯޓް ޑިއުޓީ އަދި ހިލޭ އެހީގެ އަދަދުތައްވެސް ވަނީ ފާހަގަކޮށްލެވޭ މިންވަރަކަށް މަތިވެފައެވެ.
Advertisement
ލިބުނު އާމްދަނީއާއެކު ސަރުކާރުން ވަނީ ރައްޔިތުންނަށް ފޯރުކޮށްދޭ އަސާސީ ހިދުމަތްތަކާއި އިޖްތިމާއީ ރައްކާތެރިކަމަށް ކުރާ ހޭދަ ފުޅާކޮށްފައެވެ. އެގޮތުން ސަބަބްސިޑީއަށް ކުރި ހަރަދު 75.1 އިންސައްތަ އިތުރުވެ 4.203 ބިލިއަން ރުފިޔާއަށް އަރާފައިވާއިރު، އާސަންދައިގެ ހަރަދު ވަނީ 1.864 ބިލިއަން ރުފިޔާއަށް އިތުރުވެފައެވެ.
މީގެއިތުރުން ގައުމުގެ އުމްރާނީ ތަރައްގީއަށާއި ތަރައްގީގެ މަޝްރޫއުތައް ހިންގުމަށްވެސް ބޮޑު ހޭދައެއް ކޮށްފައިވެއެވެ. އެގޮތުން ތަރައްގީގެ މަޝްރޫއުތަކަށް ކުރި ހަރަދު ނުވަތަ ކެޕިޓަލް އެކްސްޕެންޑިޗާ ވަނީ 15.9 އިންސައްތަ އިތުރުވެ 4.804 ބިލިއަން ރުފިޔާއަށް އަރާފައެވެ. އޭގެތެރޭގައި ބިމާއި އިމާރާތް ކުރުމާއި، ބަނދަރު ހެދުމުގެ އިތުރުން މުހިންމު އެހެނިހެން އުމްރާނީ ވަސީލަތްތައް ގާއިމުކުރުމުގެ މަސައްކަތްތައް ހިމެނެއެވެ.
މި ތަފާސްހިސާބުތަކުން ރަމުޒުކޮށްދެނީ ދައުލަތުގެ މާލީ ހާލަތު ހަރުދަނާވަމުންދާ މިންވަރާއި، އެއާއެކު ރައްޔިތުންނަށް ބޭނުންވާ އަސާސީ ހިދުމަތްތަކާއި ތަރައްގީގެ މަޝްރޫއުތައް މެދުކެނޑުމެއްނެތި ކުރިއަށްދާކަމެވެ. މިއީ އިގުތިސާދީ ދާއިރާއިން ފެންނަމުންދާ ވަރަށް އުއްމީދީ މަންޒަރެކެވެ.
