އިމާރާތްކުރުމުގެ މަސައްކަތުގައި އިންޝުއަރަންސް ކުރުން މަޖުބޫރުކޮށް، އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދަށް އިސްލާހު ގެނެސްފި އެވެ.
ހައުސިން މިނިސްޓްރީން މި މަހު ގެޒެޓްކުރި އެ އިސްހާލުގައި ވަނީ އިމާރާތްކުރުމުގެ މަސައްކަތްތަކުގައި އިންޝުއަރަންސް ކަވަރޭޖް ހޯދުން މަޖުބޫރުކޮށް، ޕްރޮޖެކްޓް ލައިސަންސް ދޫކުރުމުގައި އިންޝުއަރަންސްގެ ލިޔެކިޔުންތައް ހުށަހެޅުން ލާޒިމުކޮށްފަ އެވެ.
މި ބަދަލުތަކަކީ، އިމާރާތްކުރުމުގެ ސިނާއަތުގައި ހިނގާ ހާދިސާތަކުން ލިބިދާނެ ގެއްލުންތަކަށް ބަދަލު ދިނުމުގެ ނިޒާމެއް ގާއިމުކުރުމަށްޓަކައި އެޅުނު މުހިންމު ފިޔަވަޅެއް ކަމަށް މިނިސްޓްރީން ބުންޏެވެ.
މި އިސްލާހުގެ ސަބަބުން، އިމާރާތްކުރުމުގެ މަސައްކަތް ކުރަމުން ގެންދާއިރު، ވަށައިގެންވާ މާހައުލާއި މަސައްކަތު މީހުންނާއި އިމާރާތްތަކާއި ބިނާތަކާއި ހިނގާބިނގާވެ އުޅޭ ފަރާތްތަކާއި މީހުންގެ މުދަލާއި އެއްގަމު އުޅަނދުފަހަރަށް ލިބިދާނެ ގެއްލުމެއްގެ ބަދަލު ދިނުމަށްޓަކައި ކޮންމެ ޕްރޮޖެކްޓަކަށް ކަވަރޭޖް ލިބޭ ގޮތަށް އިންޝުއަރެންސް ކަވަރޭޖެއް ހޯދުން މިހާރު ވަނީ މަޖުބޫރީ ކަމަކަށް ވެފަ އެވެ.
މިނިސްޓްރީން ބުނީ މިއީ އިމާރާތްކުރާ ފަރާތްތައް ޖަވާބުދާރީ ކުރުވައި، އެފަދަ މަސައްކަތްތަކުގެ ސަބަބުން ތިމާވެއްޓަށާއި އާންމުންނަށް ލިބިދާނެ ނުރައްކާތައް ކުޑަކުރުމަށް އެޅުނު ފިޔަވަޅެއް ކަމަށެވެ.
ގަވާއިދަށް ގެނައި އިސްހާލުގައި ބުނީ އިންޝުއަރަންސް ކުރިކަމުގެ ލިޔުން، ޕްރޮޖެކްޓް ލައިސަންސް ހޯދުމަށް ހުށަހަޅަން ޖެހޭ ލިޔެކިޔުންތަކުގެ ތެރޭގައި ހިމަނަން ޖެހޭނެ ކަމަށެވެ.
މީގެ ސަބަބުން، އިންޝުއަރަންސް ނެގުމުގެ ގަވާއިދު ހަރުދަނާވެ، ކޮންމެ އިމާރާތެއް ހެދުމުގެ މަސައްކަތަށް ވެސް ހުއްދަ ލިބުމުގެ ކުރިން އިންޝުއަރެންސް ކޮށްފައިވާކަން ކަށަވަރުކުރެވޭނެ ކަމަށް މިނިސްޓްރީން ބުންޏެވެ.
