ރައްޔިތުންގެ މަޖިލީހަށް މިހާރު ފޮނުވާފައިވާ ގެދޮރުވެރިކަމާ ގުޅޭ ބިލު ފާސްވުމުން، ސަރުކާރުގެ ސޯޝަލް ހައުސިންގެ ފްލެޓްތަކަށް ކުލި ނުދައްކާ މައްސަލާގައި ފިޔަވަޅު އަޅަން ފަސޭހަވާނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

ދިވެހިރާއްޖޭގެ އަޑުން ގެނެސްދޭ "އަހާށޭ ބުނާނަން" ޕްރޮގްރާމްގައި މުއްތަލިބް ވިދާޅުވީ ކުލި ނުދައްކާ މައްސަލައިގެ ސަބަބުން ދައުލަތަށް އާމްދަނީއެއް ނުލިބުމަށް ވުރެ، އެކަމުގައި މައްސަލަ ކުރިމަތި ވަނީ އިތުރަށް ހައުސިން މަޝްރޫއުތައް ހިންގުމަށާއި އެހެނިހެން މަޝްރޫއުތަކަށް ބޭނުންވާ ފައިނޭންސިން ހޯދުމަށް ކަމަށެވެ.

ސަރުކާރުން މަޝްރޫއުތައް ހިންގަން ނަގާ ލޯނުތައް ގަވާއިދުން ދައްކަމުން ނުދާ ނަމަ، އިތުރު މަޝްރޫއުތަކަށް ލޯނު ހޯދަން ދަތިވާ ކަމަށް ވެސް މުއްތަލިބް ވިދާޅުވި އެވެ.

"ކުލި ނުދެއްކުމަކީ ދައުލަތަށް އާމްދަނީ ލިބުމުގެ ހުރަހަކަށް ވުރެ އެއީ އެއަށް ވުރެ މާ ބޮޑު މައްސަލައެއް. ބޭންކުން މަޝްރޫއުތަކަށް ފައިނޭންސް ލިބެނީ ފީސިބަލް ވީމަ. ބޭންކަށް އިނގޭ، ނަގާފައި ހުންނަ ލޯނުތައް ގަވައިދުން ފައިސާ ދައްކާ ނަމަ. އެހެންވީމަ، ގަވާއިދުން ފައިސާ ނުދެއްކުމަކީ، ބޯހިޔާވަހިކަމުގެ އެހެން މަޝްރޫއުތައް ހިންގަން އެޅޭ ހުރަހެއް. ބޯހިޔާވަހިކަން ބޭނުންވާ އެހެން ރައްޔިތުންގެ ހައްގަށް އެޅޭ ހުރަހެއް،" މުއްތަލިބް ވިދާޅުވި އެވެ.

މުއްތަލިބް ވިދާޅުވީ ސަރުކާރުން މަޖިލީހަށް މިހާރު ހުށަހަޅާފައިވާ ގެދޮރުވެރިކަމާ ބެހޭ ބިލާއެކު އެ މަސައްލައަށް ލުއިފަސޭހަ ހައްލެއް ހޯދޭނެ ކަމަށެވެ.

ސަރުކާރުން މިހާރު ދޫކޮށްފައިވާ ޔުނިޓްތައް ދޫކޮށްފައި ހުންނަނީ ސޭލް ޕާޗޭސް އެގްރިމަންޓު އުސޫލުން ކަމަށް ވުމާއެކު، ދައުލަތުން ކޯޓު މަރުހާލާއަށް ނުގޮސް ފްލެޓްތައް ސަރުކާރަށް ނަގަން ނުވަތަ ފިޔަވަޅު އެޅުމަށް ދަތިވާ ކަމަށް އޭނާ ވިދާޅުވި އެވެ.

މުއްތަލިބް ވިދާޅުވީ ކުލި ނުދައްކާ މީހުންނާ މެދު ގާނޫނީ ގޮތުން ފިޔަވަޅު އަޅަން ދަތިވި ނަމަވެސް، ގެދޮރުވެރިކަމާ ބެހޭ ބިލާއެކު، އެކަން ހައްލު ކުރެވޭނެ ކަމަށެވެ.

"މިހާރު ދޫކުރަން އުޅޭ 4،000 ފްލެޓް އެގްރިމަންޓް ކުރާނީ 25 އަހަރުގެ މުއްދަތުގެ ކުލި ދެއްކީމަ އެތަން ރަޖިސްޓްރިކޮށްދެވޭ ގޮތަށް. ކުއްޔަށް ދޭ ތަނެއްގެ ގޮތަށް އޮތީމަ، ކުލި ނުދައްކާ ނަމަ ފިޔަވަޅު އަޅަން ފަސޭހަވޭ،" އޭނާ ވިދާޅުވި އެވެ.