އިސްރާއީލުގެ އެކި ސަރަހައްދުތަކުގައި ހިނގަމުންދާ ބޮޑެތި އަލިފާންގަނޑުތަކުގެ ސަބަބުން ގިނަ އަދަދެއްގެ ގޭގެއަށް ގެއްލުންވެ، ރައްޔިތުން ގޭގޭން ބޭރުކުރަން ޖެހިފައިވާ ކަމަށް އިސްރާއީލުގެ ރަސްމީ ފަރާތްތަކުން ހާމަކޮށްފިއެވެ. މި ހާދިސާތަކުގައި އެއްވެސް މީހަކަށް އަނިޔާވި ކަމުގެ ރިޕޯޓެއް ކޮށްފައެއް ނުވެއެވެ.

އިސްރާއީލުގެ ދައުލަތުގެ މީޑިއާއިން ބުނީ ނެސް ޒިއޯނާގައި އިއްޔެއިން ފެށިގެން ހަލުވިކަމާއެކު ފެތުރެން ފެށި އަލިފާންގަނޑު ވަނީ ޖަންގަލީގައި ފެތުރި، އެ ސަރަހައްދުގެ ދިރިއުޅޭ ބައެއް ގެތަކަށް ވެސް ފޯރާފައެވެ. އަލިފާން ނިއްވާ ފަރާތްތަކުން ވަނީ ތިން އިމާރާތެއް އަލިފާނުގެ ސަބަބުން އަނދައި ހުލި ވެފައިވާ ކަމަށް ބުނެފައެވެ. އަދި، ރައްކާތެރިކަމުގެ ފިޔަވަޅެއްގެ ގޮތުން އެތައް ބަޔަކު ގޭގެއިން ބޭރުކޮށް ރައްކާތެރި ހިސާބުތަކަށް ބަދަލުކޮށްފައިވެއެވެ.

އިސްރާއީލު ސަރުކާރުން ބުނީ މި ހާދިސާ ކޮންޓްރޯލް ކުރުމަށްޓަކައި އަލިފާން ނިއްވާ 21 ޓީމެއް ހަރަކާތްތެރިވަމުންދާ ކަމަށެވެ.

އަލިފާން ނިއްވުމުގައި މަސައްކަތްތައް މިވަގުތުވެސް ހިނގަމުންދާއިރު، ހޫނު މޫސުމުގެ ސަބަބުން ހާލަތު ގޯސްވަމުންދާކަމަށް ޚަބަރުތައް ބުނެއެވެ.