ސިފައިންގެ ވިޔަފާރި ކުންފުނި، ސިވެކްގެ ލޭންޑިންގ ކްރާފްޓެއް ޅ. ކާށިދޫ ކަނޑުތެރެއަށް ބަންޑުން ޖަހާލި ހާދިސާގައި، އެމްއެންޑީއެފްގެ ވޮރަންޓް އޮފިސަރ 2، އަލީ ހާމިދު ނިޔާވެއްޖެ ކަމަށް އެމްއެންޑީއެފްއިން ބުނެފިއެވެ. މި ހާދިސާ ހިނގާފައިވަނީ މިއަދު ހެނދުނު 10:30 ހާއިރު، މާލެއިން ފުރައިގެން ޅ. އަތޮޅަށް ދަތުރުކުރަނިކޮށެވެ.
ބަންޑުން ޖަހާލި ސިވެކްގެ "އެލްސީ 308" ނަމްބަރު ލޭންޑިންގ ކްރާފްޓުގައި ޖުމްލަ ފަސް މީހުން ދަތުރުކުރި ކަމަށް ވެއެވެ. އެއީ ތިން ސިފައިންނާއި ދެ ބިދޭސީންނެވެ. ހާދިސާގެ މައުލޫމާތު ލިބުމާއެކު، އެމްއެންޑީއެފްއިން ވަނީ ކަނޑުމަގުންނާއި ވައިގެމަގުންވެސް އެ އުޅަނދު ހޯދައި، ދަތުރުކުރި މީހުން ސަލާމަތްކުރުމުގެ މަސައްކަތް ފަށާފައެވެ.
ހާދިސާގައި ގެއްލުނު ދެ މީހުންގެ ތެރެއިން އެކަކު ކަމަށްވާ ވޮރަންޓް އޮފިސަރ 2 އަލީ ހާމިދު ވަނީ އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑު ފަސްޓް ސްކޮޑްރަންގެ ޑައިވަރުން ހޯދާފައެވެ. އަލީ ހާމިދު ފެނިގެން ޅ. ނައިފަރު ހޮސްޕިޓަލަށް ގެންދިޔަ އިރުވެސް ނިޔާވެފައިވާ ކަމަށް، އެ ހޮސްޕިޓަލުން ވަނީ މައުލޫމާތު ދީފައެވެ.
މިހާރުވެސް މި ހާދިސާގައި ގެއްލިފައިވާ ބިދޭސީ މީހާ ހޯދުމުގެ މަސައްކަތް އެމްއެންޑީއެފްއިން ދަނީ ކުރަމުންނެވެ.
