ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ފައްޔާޒު ފެކްޝަނުގެ ފަރާތުން މިއަދު ހެދުނު 11 ޖަހާއިރު އެ ޕާޓީގެ އޮފީހުގައި ނޫސްވެރިންނާއި ބައްދަލުކުރަން ނިންމައިފިއެވެ.
މި ބައްދަލުކުރުމުގައި އިސްކޮށް ހަރަކާތްތެރިވާނީ ފައްޔާޒުގެ އިތުރުން އެ ޕާޓީގެ ރައީސް އަބްދުﷲ ޝާހިދެވެ. އެ ޕާޓީން އެކްސްގައި ކުރި ޕޯސްޓެއްގައި ބުނީ ނޫސްވެރިންނާއި ބައްދަލުކުރުމުގެ މައިގަނޑު މަޤްސަދަކީ އެ ޕާޓީގެ 20 ވަނަ އަހަރީ ދުވަހާއި ގުޅިގެން ކުރިޔަށް ގެންދަން ނިންމާފައިވާ ހަރަކާތްތަކާއި ގުޅޭގޮތުން މަޢުލޫމާތު ފޯރުކޮށްދިނުމަށް ކަމަށެވެ.
ބައިބައިކަން އުފެދިފައިވާ އެމްޑީޕީގައި މިވަޤުތު އެންމެ ހަރަކާތްތެރިކޮށް ފެނިގެން މިދަނީ ފައްޔާޒު ފެކްޝަންގެ ފަރާތުންނެވެ. ފައްޔާޒު އިސްވެ ހުރެ ދަ ޑިމޮކްރަޓްސް އާއި ބައްދަލުކުރުންތަކެއް ކުރިޔަށް ގެންގޮސް މިހާރު ވަނީ ޑިމޮކްރެޓްސް ރޫޅާލައި އެ ޕާޓީގެ އިސް މެންބަރުން އެމްޑީޕީއަށް އަލުން އަނބުރާ ވައްދާލާފައެވެ. މިގޮތުން ހޯމަ ދުވަހުގެ ރޭ އެ ޕާޓީގެ ލީޑަރު އަދި ކުރީގެ ރައީސް މުޙައްމަދު ނަޝީދުގެ ސޮއި އެމަނިކުފާނު ވަނީ އެމްޑީޕީއަށް ހޯދާފައެވެ. ސާފު ނުވަނީ އެ ފެކްޝަނުން ރިޔާސީ ރޭހަށް ނިކުންނަނީ ހުދު އެ ބޭފުޅާތޯ ނޫނީ ރައީސް ނަޝީދު ތޯއެވެ. ޚަބަރު ލިބޭ ގޮތުގައި ޝާހިދުވެސް ހުރީ ވެރިކަމަށް ފައި ވިއްދާފައެވެ. މިވަޤުތު ޝާހިދު ފެންނަނީ ފައްޔާޒު ފެކްޝަނުން ބާއްވާ އިވެންޓުތަކުގައެވެ.
އެމްޑީޕީ ތެރޭގައި ކޯޅުން ބޮޑުވެފައި މިވަނީ ގިނަ އަދަދެއްގެ މެންބަރުން ވެރިކަމަށް ފައި ވިއްދާފައިވާތީއެވެ. އެ ޕާޓީ ތެރޭގައި ގިނަ ފެކްޝަންތަކެއް އުފެދިފައިވާއިރު ރައީސް ނަޝީދު އެމްޑީޕީއަށް ސޮއި ކުރި ޖަލްސާގައި ބައިވެރިވީ އެ ޕާޓީގެ މަދު ލީޑަރުންތަކެއްކަން ފާހަގަކުރެވެއެވެ.
